Juri na’in-tolu husi Portugal to’o ona Timor-Leste

DILI, 14 Setembru 2026 (TATOLI)–Juri na’in-tolu husi Portugal to’o ona iha Timor-Leste, iha Segunda ne’e hodi hamutuk ho Komisaun Rekrutamentu bele fó  teste ba kandidatu Juíz Supremu Tribunál Justisa (STJ) no Tribunál Rekursu (TR).

Juri sira ne’e mai ho Aviaun Aero Dili to’o iha Aeroportu Internasionál Nicolau Lobato Komoro iha tuku 14:00, simu husi Prezidente Komisaun Rekrutamentu, Avelino Coelho, ne’ebé akompañadu husi nia Komisária Carmelita Caetano Moniz no Komisáriu José Pedro Camões.

Prezidente Komisaun Rekrutamentu no Selesaun ba Juíz Supremu Tribunál Justisa, Avelino Coelho, hateten, Ohin komisaun mai halo resesaun ba juri ne’ebé mak komisaun kontrata atu halo konkursu.

“Sira too ohin, aban sira sei haree serbisu balun, dia 18 to’o 21 Setembru ezame eskritu ba Supremu Tribunál Justisa. Depois iha loron 21 to’o 28 ezame eskritu ba Juizes Dezembargadores ba Tribunál Rekursu. Ne’e duni ami na’in-tolu Komisáriu Komisaun Rekrutamentu no Selesaun mai simu sira para depois hahú ona prosesu ezame,” Avelino Coelho hateten ba Jornalista sira liuhusi konferénsia imprensa ne’ebé hala’o iha Aeroportu Internasionál Prezidente Nicolau Lobato, Komoro.

Notísia relevante : Jurista Pedro Camões konsidera desizaun KSMJ tenta imposibilita Juíz iha TR

Iha fatin hanesan, Komisária Carmelita Moniz, informa, juri hamutuk na’in-tolu ho sekretáriu ida mak mai.

“Ne’ebé sekretáriu ne’e nu’udar Ofisiál Justisa iha Supremu Tribunál Justisa Portugal nian, ne’ebé nomeadu pelu Konsellu Superiór Majistratura Judisiária Portugal nian,” nia tenik.

Jornalista     : Natalino Costa

Editora         : Julia Chatarina