Konfirmadu asu pozitivu raiva sa’e bá 11 iha Vikeke
VIKEKE, 15 Setembru 2026 (TATOLI)–Xefe Departamentu Veterináriu Servisu Ministériu Agrikultura, Peska, Pekuária no Floresta (SMAPPF) Munisípiu Vikeke, Domingos do Carmo Pinto, informa kazu atuál raiva iha Munisípiu Vikeke konfirmadu asu pozitivu raiva sa’e ba 11, iha Postu Vikeke Vila, Uatulari no postu Ossú.
“Kona-ba kazu raiva iha Munisípiu Vikeke daudaun ne’e ita-nia kazu asu pozitivu raiva rejista sa’e ona bá 11. Detetadu tan iha Postu Uatulari ida no Postu Ossú ida, ne’ebé vírus raiva komesa aumenta ba beibeik ona,” Domingos ba TATOLI iha Postu Vikeke Vila, Tersa ne’e.
Notísia relevante: Prevene vírus raiva, Ekipa Veterináriu Vasina asu 260 iha Suku Bahalaraua’in
Xefe Departamentu Veterináriu ne’e dehan kazu raiva ne’ebé númeru kontinua sa’e presiza halo prevensaun ba postu sira-ne’ebé daudaun ne’e resjistu pozitivu ba raiva.
“Ami veterináriu preparadu halo vasina no ita-nia estoke ai-moruk vasina asu nian sei 100-resin. Maibé, ami-nia dezafiu mak transporte tula jeleira ba postu, tanba vasina hotu lorokraik tenke hatama ai-moruk ba jeleira laran. Tan ne’e mak ami seidauk bá halo vasina ba asu sira iha Postu Uatulari,” nia hato’o.
Nia subliña daudaun ne’e jeleira rai ai-moruk iha ona Munisípiu Vikeke, maibé atu transporta bá postu mak laiha transporte.
“Preokupasaun transporte ne’e ami aprezenta ona ba nasionál, maibé sira dehan ba ami katak sei halo hela planu. Ho ida-ne’e seidauk apoiu transporte ba ami hodi tula jeleira ba postu,” nia haktuir.
Aleinde ne’e, Domingos informa, veterináriu Munisípiu Vikeke sei koordena ho Diretór SMAPPF Munisípiu Vikeke hodi haree asuntu transporte para halo vasinasaun ba asu sira iha postu rua.
“Ba kazu raiva daudaun ne’e ita-nia tékniku veterináriu sira kontinua ba suku sira rekolla amostra asu nian hodi halo teste, atu ita bele hatene kazu raiva iha Munisípiu Vikeke,” nia dehan.
Tuir dadus, kazu asu pozitivu raiva iha Munisípiu Vikeke ho totál hamutuk 11, rejistadu iha Postu Vikeke Vila hamutuk sia (9), Postu Uatulari ida (1) no Postu Ossú ida (1).
Jornalista: Vitorino Lopes da Costa
Editór: Xisto Freitas da Piedade
