Meza Parlamentu husu bankada parlamentár atu aprezenta kandidatu ba komisáriu CNE
DILI, 15 Setembru 2026 (TATOLI) – Meza Parlamentu Nasionál, ohin hahú halo anúnsiu abertura prazu loron sanulu ba bankada parlamentár sira atu aprezenta kandidatu ba komisáriu Komisaun Nasionál Eleisaun (CNE, sigla portugés).
“Ha’u deklara aberta, prezentasaun tuir termu legál no rejimentál aplikavel ba kandidatura ba eleisaun husi Parlamentu Nasionál, membru na’in-tolu efetivu no ida suplente ba Komisaun Nasionál Eleisaun”, Prezidente Parlamentu Nasionál, Maria Fernanda Lay, hatete iha sala plenária Parlamentu, ohin.
Nia husu atu deputadu sira prepara submisaun kandidatura dentru prazu ne’ebé husu.
Lembra katak, Prezidente CNE, José Agostinho Belo, ho nia kompozisaun atuál ninia mandatu ramata ona iha 16 Agostu ne’e.
Tuir Lei númeru 7/2026, 29 Maiu, alterasaun dahaat husi Lei númeru 5/2006, 28 Dezembru, Órgaun Administrasaun Eleitorál, reprezentasaun husi Parlamentu Nasionál iha membru na’in-tolu ba CNE, ho mandatu tinan lima, renovavel.
No órgaun lejizlativa ne’e mak sei hili Prezidente CNE liuhusi eleisaun ba kandidatu sira ne’ebé bankada parlamentár sira aprezenta.
Kompozisaun komisáriu CNE ne’e iha membru efetivu ida no suplente ida nomeia husi Prezidente Repúblika.
No Governu rasik liuhusi desizaun reuniaun Konsellu Ministru iha loron 12 fulan-Agostu ne’e indika ona Elviro Fernandes Moniz nu’udar membru efetivu no Odete Maria Belo nu’udar suplente ba membru CNE ho periódu 2026 to’o 2031.
Enkuantu na’in-ida membru efetivu no suplente ida husi Konsellu Majistratura Judisiál no membru efeitu ida no suplente ida husi Konsellu Majistratura Ministériu Públiku.
Tuir lei Prezidente Parlamentu mak sei fó pose hafoin dezignasaun.
Notísia relevante: Bankada CNRT prepara ona kandidatu ba komisáriu CNE
Jornalista: Nelson de Sousa
Editora: Maria Auxiliadora
