SERVE, I.P Kovalima arrekada reseita rihun $17-resin ba Kofre Estadu
KOVALIMA, 15 Setembro 2026 (TATOLI)- Servisu Rejistu no Verifikasaun Emprezariál, Institutu Públiku (SERVE, I.P.), rekolla ona reseita $17.688 ba kofre Estadu.
Koordenadór SERVE, IP Sukursal Kovalima, Domingos Amaral, hateten katak iha períodu fulan ualu ne’e, SERVE, I.P halo verifikasaun no rejistu ba operadór ekonómiku hamutuk 567.
“Durante Janeiru to’o Agostu, rejistu foun hamutuk 45. Operadór ne’ebé mai halo renovasaun no retensaun dokumentu hamutuk 381 no sira ne’ebé halo alterasaun ba atividade hamutuk 101”, Domingos Gavrila Amaral relata ba jornalista sira iha Kovalima.
Domingos Amaral hateten katak reseita $17.688 ne’ebé rekolla durante períodu refere mai husi taxa servisu ne’ebé operadór ekonómiku sira selu bainhira halo rejistu, renovasaun no alterasaun ba sira-nia atividade.
“Husi Janeiru to’o Agostu, ita rekolla reseita hamutuk $17.688 husi operadór ekonómiku sira ne’ebé mai halo rejistu no servisu seluk iha SERVE, I.P Sukursal Munisípiu Kovalima,” nia akresenta.
Nia subliña katak entidade ka ema ne’ebé hala’o atividade ekonómika tenke halo rejistu atu hetan legalidade ba atividade ne’ebé hala’o. Ho obrigasaun atu halo rejistu ne’e bazeia ba Dekretu-Lei N.° 34/2017, kona-ba Lisensiamentu Ekonómiku, ne’ebé promulgadu iha 27 Setembru 2017.
Dekretu-Lei ne’e regula lisensiamentu ba atividade ekonómika (Autorização para Exercício de Atividade Económica), ne’ebé SERVE, IP iha responsabilidade atu emite ba operadór ekonómiku sira.
Notisia relevante: SERVE,I.P Kovalima rejista operadór ekonómiku hamutuk 400
Jornalista:Celestina Teles
Editór: Florencio Miranda Ximenes
