MCI lansa produtu Marungi husi Emperza M2T no plataforma E-komérsiu Timor Shop
DILI, 14 Setembru 2026 (TATOLI)—Ministériu Komérsiu no Indústria (MCI), halo lansamentu ba produtu marungi husi Empreza Mina Marungi Timor-Leste (M2T) no lansamentu plataforma online E-komérsiu Timor Shop sai hanesan atividade importante atu promove produtu lokál no dudu komérsiu dijitál iha Timor-Leste.
“Ohin, ita halo lansamentu ba atividade rua ne’e fó espasu ba produtór lokál sira liuliu M2T, atu promove no komersializa produtu marungi no produtu seluk ne’ebé transforma husi matéria-prima lokál nian,” Ministériu Komérsiu no Indústria (MCI), Filipus Nino Pereira, hateten iha salaun MCI, ohin.
Nia hatutan, M2T hatudu ona kriatividade atu transforma marungi sai produtu ho valór ekonómiku no kria kadeia valór, husi agrikultór sira-ne’ebé kuda marungi to’o iha konsumidór nia liman.
“Ida-ne’e hanesan inisiativa ka kriatividade husi M2T oinsá atu transforma marungi sai produtu ne’ebé saudável no iha nia valór ekonomiku. Iha mós nia kadeia valór, ne’ebé husi agrikultór sira-ne’ebé kuda marungi tama to’o iha konsumidór nia liman,” nia afirma.
Nia esplika, Governu Konstitusionál da-sia (IX) nia hakarak mak MCI promove no komersializa produtu lokál sira, atu sai produtu ne’ebé fó orgullu ba nasaun.
Kona-ba Timor Shop, Nino Pereira, dehan plataforma online ne’e bele sai kanál dijitál ba promosaun no venda produtu M2T no produtu lokál sira seluk, inklui esforsu atu fasilita sistema pagamentu dijitál.
“Ida-ne’e hanesan sinál ka jestaun ida, atu oinsá ita bele aproveita kanal dijitál ne’ebé mak iha ne’e bele promove produtu,” nia hateten.
Ministériu Komérsiu no Indústria (MCI), Filipus Nino Pereira, afirma Timor-Leste ne’ebé agora tama ona komunidade ASEAN no ko’alia kona-ba ekonomia dijitál, presiza aproveita aplikasaun no plataforma dijitál atu dudu komérsiu ba oin.
Nia dehan, Governu sei halo esforsu liuhusi polítika no regulamentu atu promove produtu lokál, garante kualidade no seguransa, nune’e produtu sira bele sirkula iha merkadu nasionál no internasionál inklui oportunidade ba esportasaun.
Nia dehan, M2T agora diversifika produtu marungi tahan sai produtu 13 no sei kontinua aumenta tan.
“Kona-ba produtu marungi tahan de’it, sira diversifika produtu sai produtu 13 no ne’e sei barak liután,” nia haktuir.
Nia mos enkoraja produtór no empreendedór sira atu aproveita feira nasionál, feira internasionál no kanál online hanesan Facebook no TikTok atu promove produtu lokál. Maibé marketing efetivu liu ne’e mak ibun ba ibun.
Iha fatin hanesan, Jerente Empreza M2T, Unip, Lda, Cristiano dos Santos, hateten lansamentu Timor Shop no produtu lokal hanesan Moffu, Marungi Uut la’ós de’it kona-ba fa’an produtu, maibé mos atu promove produtu lokal, kultura, koñesimentu tradisionál, moris saudável, inovasaun no ekonomia Timor-Leste.
Nia hatetemn M2T hakarak liga koñesientu tradisionál ho ciênsia, kualidade, inovasaun no merkadu dijitál.
“Ho Timor Shop, ami hakarak kria ponte entre prodútór lokál no merkadu. Teknolojia digitál bele ajuda produtu lokál hetan asesu ba konsumidór sira ho maneira fasil liu,” nia hateten.
Nia informa, produtu Moffu, Marungi Uut, Green T Mor no produtu seluk husi M2T parte husi esforsu atu valoriza produtu lokál no kria kadeia valór, husi matéria-prima, prosesamentu, embalajen, marka no marketing to’o iha konsumidór.
“Ho sistema ida-ne’e, ita bele kria oportunidade ba agrikultór, prodútór, empreendedór no juventude Timor-Leste,” nia dehan.
Nia mos afirma, dezenvolvimentu produtu herbal tenke halo ho responsabilidade liuliu iha kualidade, seguransa, evidénsia no regulamentasaun no la halo promesa katak produtu herbal bele substitui tratamentu médiku.
Nia informa, setor produtu herbal no ekonomia verde bele sai oportunidade ba juventude iha área agrikultura, prosesamentu, embalajen, marketing dijitál, e-commerce, design, peskiza no teknolojia.
Nia afirma, katak dezenvolvimentu produtu lokál presiza kolaborasaun entre Governu, ministériu relevante, profisionál saúde, universidade no instituisaun peskiza, setor privadu, produtor, komunidade no parseiru internasionál.
Jornalista : Felicidade Ximenes
Editór : Cancio Ximenes
