Kamboja bandu jogu online hotu-hotu iha fulan-Outubru
DILI, 16 Setembru (TATOLI) – Primeiru-Ministru Kamboja nian, Hun Manet, fó-sai iha loron-kuarta ne’e katak nasaun sudeste aziátiku ne’e sei suspende operasaun jogu online hotu ne’ebé iha ligasaun ho kasinu fíziku sira hahú iha fulan-Outubru, iha esforsu ida hodi kombate fraude bazeia ba teknolojia.
Ko’alia iha inaugurasaun ba Ospitál Luang Me (Inan Liurai-feto) iha Phnom Penh, Hun Manet hatete katak suspensaun ne’e hakarak atu kombate fraude ne’ebé maka hamosu hosi teknolojia no fluxu finanseiru ilísitu sira, hodi nota katak jogu online sai difisil tebes atu regula.
“Operasaun jogu online hotu-hotu sei suspende hahú iha inísiu fulan-Outubru tanba ami kontinua ami-nia represaun maka’as hasoru eskema online sira hodi asegura katak sira la fila fali,” nia hatete.
Primeiru-Ministru mós nota katak númeru atuál hosi kasinu liu 100 iha Kamboja maka barak liu. Nia fó instrusaun ba autoridade sira atu haree filafali rekizitu sira lisensiamentu nian ho objetivu atu hamenus númeru totál estabelesimentu sira-nian.
Kamboja tradisionalmente fó lisensa ba kasinu sira hodi hasa’e turizmu estranjeiru, tanba lei nasionál bandu maka’as sidadaun Kamboja sira atu joga.
Ho esesaun ba resort NagaWorld iha kapitál, Phnom Penh, kasinu hotu-hotu iha reinu opera iha fronteira internasionál sira ka iha provínsia kosteira Preah Sihanouk.
Notisia relevante: Tribunál aplika prizaun preventiva ba arguidu Scaming call Center iha Fomentu II
Fonte: Xinhua
