Ministru Justisa klarifika razaun ezonera Alexandre Cortereal husi Vogál KSMJ
DILI, 16 Setembru 2026 (TATOLI)–Ministru Justisa, Sergio Hornai klarifika razaun ezonera Alexandre Cortereal ne’ebé reprezenta Governu nu’udar Vogál iha Konsellu Superiór Majistratura Judisiál (KSMJ), iha ámbitu reuniaun Konsellu Ministru estraordinária, iha Sesta (11/09).
“Iha nia razaun própriu ne’ebé ita halo ezonerasaun, tanba hetan nomeasaun ou hetan konfiansa mas kuandu iha buat balun que la saida ita tenke avoka fali konfiasa ne’ebe ita atribui,” Ministru Sergio hateten ba Jornalista sira hafoin partisipa iha reuniaun ezekutivu, Palásiu Governu, Kuarta ne’e.
Governante ne’e dehan, razaun seluk Governu deside ezonera tanba daudaun Alexandre Cortereal nu’udar kandidatu ida husi vaga selesaun ba Juíz Supremu Tribunál Justisa (STJ), ne’ebé KSMJ admite nia hodi reintegra ba vaga ne’e, maski antes ne’e hetan ona eskluidu husi juri.
“Pur ezemplu, se ha’u ba Komisáriu Komisaun Antí-Korrupsaun, ha’u tenke sees-an husi serbisu sira hotu para ha’u bele serbisu ho imparsiál hodi halo ho objetiva nomós iha independente,” nia akresenta.
Notísia relevante : PTR konfirmadu hili direitu konsentimentu la partisipa iha desizaun ikus ba Juíz STJ
Nia esplika, KSMJ nu’udar oógaun ida-ne’ebé lejítimu, ne’ebé sei hili juíz sira no halo promosaun tanba bainhira Vogál ruma atu halo buat ida tenke sees-an husi ne’ebá para labele iha konflitu interrese. Tanba ne’e, ezonerasaun ne’e laos arbiru maibé haree sirkustánsia sira ne’e hotu mak halo ezonerasaun.
“Iha motivasaun própriu tanba iha fundamentu ne’ebé ha’u hato’o iha ne’ebá tenke ita sai Vogál iha Konsellu ne’ebé reprezenta Governu. Ita ba interrese lijíitimu órgaun ida-ne’ebé ita reprezenta interrese atu ko’alia iha Konsellu Superiór Majistratura ka iha fatin ne’ebé de’it. Tanba ita reprezenta iha ne’ebá ita la’os ba ho personalidade pesoál hodi reprezenta ita-nia interrese rasik,” nia katak.
Ministru Justisa molok ne’e bolu ona Alexadre hodi esplika kondisaun sira molok halo ezonerasaun.
Nia dehan, molok atu ezonera Alexadre husi vogál KSMJ ne’e nudar Ministru Justisa bolu ona Alexadre Cortereal hodi da hodi esplika ba nia.
“Pode ser ida-ne’e hotu no iha mós razaun sira seluk. Ita-boot sira kuandu imi-nia instituisaun, xefe orienta mak imi la halo tuir ne’e nusa?. Entaun iha ne’e tenke iha koordenasaun, kooperasaun, tenke halo ponderasaun, tanba iha kestaun estratéjiku balun ne’ebé halo alineasaun ba konfiasa serbisu ne’ebé atribui ba personalidade ida-ne’e. Nia sai nu’udar reprezentante instituisaun ne’e iha fatin ne’ebé ita reprezenta, entaun tenke koopera,” nia tenik.
Governate ne’e dehan, Alexadre Cortereal nia iha direitu tomak atu konkorre vaga ba rekrutamentu no selesaun Juíz STJ nian.
“Konsellu Superiór ne’e órgaun ida atu halo validasaun ba desizaun sira ne’ebé aban bainrua komisaun juri selesaun rekrutamentu Juíz ba Tribunál Supremu. Entaun, ita tenke livre husi ne’ebá para evita konflitu interrese,” Ministru hato’o.
Nia hatutan: “Kuandu ó iha ne’ebá nafatin bele mosu fatin inkompatibilidade no maske ó nia suplente sira mak foti mós nafatin inkompatibilidade. Tanba ita ezerse hela funsaun ida-ne’e. Ita labele komparese iha ne’ebá atu bele hola desizaun ruma, tanba ita vinkula-an hela iha instituisaun ne’e.”
Jornalista : Natalino Costa
Editora : Julia Chatarina
