PTR konfirmadu hili direitu konsentimentu la partisipa iha desizaun ikus ba Juíz STJ
DILI, 15 Setembru 2026 (TATOLI)–Prezidente Tribunál Rekursu (PTR), Afonso Carmona, hateten, bainhira nia liu iha teste vaga rekrutamentu juíz sira ne’ebé atu hala’o knaar iha Supremu Tribunál Justisa (STJ) no Tribunál Rekursu (TR), ho konsentimentu nia sei hili sai husi reuniaun Konsellu Superiór Majistratura Judisiáriu (KSMJ).
Bazeia ba Konstituisaun RDTL artigu 128, atu halo nomesaun ka promosaun ba juíz ida tuir andamentu prosesuál, Konsellu mak tenke hili no PTR ne’ebé nu’udar mós Prezidente ba KSMJ mak sei lidera Konsellu ne’e.
“Sé Konsellu la hili nia entaun nia la sai juíz atu tuur iha Supremu Tribunál ka Tribunál Rekursu no tuur iha Tribunál Primeira Instánsia. Se bainhira ha’u la lidera buat ne’e oinsá juíz ne’e iha, ne’e juíz laiha, ne’e Konsellu mak deside, agora sé mak envolve iha laran ne’e nia mak hatene-an, katak nia tama atu deside buat ne’e tuir nia interrese iha laran, ne’e konflitu interrese, entaun nia tenke ser sees,” Afonso Carmona esplika ba Jornalista sira iha Parlamentu Nasionál, Tersa ne’e.
Notísia relevante : PTR sei la partisipa reuniaun desizaun KSMJ ikus ba rekrutamentu Juíz
Nia hatutan: “Agora pur ezemplu ha’u mak envolve orsida ema dehan Afonso Carmona ó nia naran iha ne’e, ha’u mós hambriik husu deskulpa sai. Orsida sira ko’alia ha’u tama mós di’ak, la tama mós di’ak tanba iha Konsellu ne’e reprezentante husi Prezidente, Governu, Parlamentu no Tribunál mós iha, sira atu hili sé ne’e tamba membru Konsellu la’ós juíz ho juíz mak hili malu.”
Juíz ne’e Konsellu mak deside, ne’ebé nia halo serbisu ba selesaun de’it, maibé Konsellu mak determina.
“Ne’e Konstitusaun mak ko’alia, ne’e artigu 128 mak ko’alia. Sé mak lidera Konsellu ne’e mak Prezidente Tribunál Rekursu. Buat ne’e regra iha karik ha’u mak liu selesaun ne’e mak ha’u nia naran iha, katak Afonso Carmona ne’e ha’u hili la hola parte, maibé depende ba prosesu, karik ha’u mak liu prosesu ne’e karik laliu mós ha’u kontente nafatin, tanba bele partisipa ona prosesu ne’e,” nia katak.
Nia dehan, buat hotu sei iha hela prosesu, tanba ne’e mak husu ba atu akompaña prosesu rekrutamentu vaga no sesaun ba juíz sira ne’ebé atu tuur iha STJ no TR ne’ebé sei hala’o iha Sentru Formasaun Jurídiku iha Kaikoli iha loron 18 to’o 28 Setembru.
Carmona konfia juri na’in-tolu husi Portugal ne’e atu mai halo selesaun ba Juíz sira.
“Juri ne’e nia atu loos ka la loos importante nia halo serbisu hanesan juri. Ita tenke ser konfia ema,” nia subliña.
Prezidente Tribunál Rekursu garante katak prosesu estabelesimentu STJ liliu kandidatu juíz sei la’o ho transparánsia.
“Husi públiku nia preukupasaun ne’e di’ak, tanba ne’e kontrolu sosiál ita respeitu loos, ita kontente tanba ema hotu bele ko’alia ida-ne’e. Desde ha’u sai Prezidente Tribunál Rekursu sira kestiona ha’u-nia legalidade, ida-ne’e halo ha’u kontente. Tanba Timor oan barak hahú diskute ne’e no lee lei para evita internasionál mai kaer ita-nia lei ne,”nia hato’o.
Jornalista : Natalino Costa
Editora : Julia Chatarina
