PTR apresia serbisu Tribunál hahú menus dependénsia husi Asesór estranjeiru
DILI, 16 Setembru 2026 (TATOLI)–Prezidente Tribunál Rekursu (PTR), Afonso Carmona, hateten, to’o agora funsionamentu Tribunál Rekursu no Tribunál Judisiál Primeira Instánsia sira la dependénsia liu ba Asesór estranjeiru sira.
“Uluk ita-boot sira haree hahú husi 2000 to’o 2014 juri internasionál sira sempre akomapaña ita to’o julgamentu sira iha Tribunál sira akomapaña ita-nia juíz to’o desizaun sira mós kontinua akompaña. Maibé hahú husi 2014 to’o 2026 ita ladún ona depende ba sira, imi haree julgamentu sira ita-nia juíz sira mak prezide no desizaun sira mak foti. Ida-ne’e hatudu ita laiha ona dependénsia boot ba sira. Ida-ne’e mak ha’u kontente, katak ita-nia Tribunál hahú ho marku boot ida katak hahú hatudu dezenvolvimentu signifikativu,” Afonso Carmona hato’o ba Ajénsia TATOLI iha nia knaar fatin, Kaikoli, Kuarta ne’e.
Notísia relevante : Rekrutamentu majistradu judisiáriu estranjeiru reforsa serbisu justisa
Nia dehan, daudaun iha ona promosaun ba juíz timoroan atu sai juíz profisionál iha área jurídiku iha setór justisa.
“Ha’u-nia tempu ha’u haree ita-nia ema sai juíz ne’ebé mak iha kapasidade, tanba ha’u hakarak fó oportunidade ba sira atu sira sai juíz di’ak no iha koñesimentu kle’an. Ida-ne’e mak ha’u foin kontente,” nia akresenta.
Prezidente Tribunál Rekursu nota, iha ema barak mak krítika nia kapasidade maibé nia la tau importánsia tanba konsidera hanesan perspetiva pesoál.
“Nu’udar Prezidente ba Tribunál atu ema hotu kontribui harii Supremu Tribunál Justisa ho di’ak. Supremu Tribunál ne’e Prezidente Repúblika José Ramos nia polítika no Avo Nana nian polítika. Governu nia polítika ita tenke aliña, sira hakarak iha tinan 24 ita-nia Indonésia ida-ne’e tenke iha Supremu Tribunál,” nia katak.
Jornalista : Natalino Costa
Editora : Julia Chatarina
