Horta rekomenda kriasaun unidade navál ho país viziñu atu reforsa seguransa marítima
DILI, 17 Setembru 2026 (TATOLI)-Prezidente Repúblika, José Ramos-Horta, sujere ba Governu atu serbisu hamutuk ho nasaun viziña Indonézia no Austrália hodi kria unidade navál konjunta atu reforsa kontrola seguransa marítima.
Nia dehan defeza, seguransa no soberania sai nu’udar prioridade, tanba ba nia, seguransa marítima importante liu ba Timor-Leste.
“Ita presiza reforsa vijilánsia no protesaun ba ita-nia bee sira, kombate peska ilegál, proteje rekursu tasi nian no dezenvolve akordu kooperasaun estratéjika sira, liuliu ho ita-nia país viziñu sira, Austrália no Indonézia”, nia hatete iha abertura sesaun solene lejislativa dahaat, iha lejislatura daneen, iha Parlamentu Nasionál.
Maibé, tuir nia laiha estratéjia seguransa marítima ida maka sei sai efikás lahó komponente aérea, ne’ebé hetan apoiu husi veíkulu aéreu tripuladu sira, ka husi drone sira ho distánsia dook ne’ebé armadu ho instrumentu letál no la’ós letál.
Prezidente salienta katak iha sirkunstánsia sira-ne’e, estratéjia seguransa marítima ne’ebé di’ak liu idealmente sei sai estratéjia ne’ebé hala’o ona ativamente ho Austrália no Indonézia.
“Ha’u rekomenda kriasaun unidade navál espesiál timoroan no australianu sira-nian, ne’ebé hetan treinu iha Timor-Leste ka iha Austrália. Iha kazu ida-ne’e, ha’u kontente hatene katak timoroan balun tuir ona kursu formasaun iha Austrália no iha Timor-Leste”, nia dehan.
Hodi dehan dimensaun forsa nian tenke avalia ho kuidadu. País ida-idak sei iha unidade navál ki’ik ida husi mane no feto sira bazeia ba baze rotasaun iha país seluk nia baze marítima. No patrullamentu sira sei ezekuta nafatin hamutuk ho frekuénsia ne’ebé nesesária no sustentavel.
Notísia relevante: Prezidente Repúblika konsidera F-FDTL nu’udár kontinuasaun obra FALINTIL
Jornalista: Nelson de Sousa
Editora: Maria Auxiliadora
