Misaun Dentál Singapura fó tratamentu ba labarik 1.500
BAUKAU, 17 Setembru 2026 (TATOLI)–Embaixadora Singapura ba Timor-Leste, Teo Lay Cheng, Kuarta ne’e, vizita Klínika Maria Auxiliadora iha Venilale, Munisípiu Baukau hodi akompaña diretamente servisu misaun dentál husi Universidade Nasionál Singapura (NUS).
Misaun ne’ebé hala’o durante semana ida, hahú 17 to’o 23 Setembru 2026, halibur profisionál dentál seniór na’in-13 husi Singapura.
Objetivu prinsipál mak atu fórnese tratamentu gratuita hanesan fokit nehan, tratamentu preventivu no edukasaun ijiene orál ba labarik eskola oan hamutuk 1.500 resin.
Hanesan Antigu alunu NUS, Embaixadora Teo apresia ekipa ne’ebé voluntáriamente fó sira-nia tempu no matenek hodi halo tratamentu nehan ba labarik sira.
“Sira lori ona ekipamentu no sasán médiku sira ne’ebé la fásil atu hetan iha rai-laran. Maibé importante liu mak ekipa ne’e mós lori koñesimentu, abilidade no esperiénsia ne’ebé luan atu fahe ho komunidade,” Embaixadora hateten, hanesan sita iha nota ne’ebé Ajénsia TATOLI asesu.
Notísia relevante: MS fó konsulta nehan gratuita iha ámbitu selebrasaun loron mundiál saúde orál
Nia hanoin hikas Primeiru-Ministru Singapura, Lawrence Wong nia vizita mai Timor-Leste iha Fulan-Jullu liubá, hanesan vizita dahuluk ida, ne’ebé hatudu importánsia atu hametin ligasaun husi povu ba povu, aleinde relasaun Governu ba Governu.
“Esforsu hotu-hotu, boot ka kiik bele ajuda hakbesik Timor-Leste ba família ASEAN no hametin lasu entre ita-nia povu,” Diplomata ne’e subliña.
Iha biban hanesan, Embaixadora Teo agradese ba Irman Saleziana sira ne’ebé fasilita servisu voluntáriu.
“Ho ita-boot nia rede globál ne’ebé luan no servisu ne’ebé ema tau fiar ba imi, imi sai hanesan parseiru ideál ba misaun dentál ida-ne’e,” nia reforsa.
Líder Misaun, Dr. Eugene Loh, hateten katak ekipa ne’e iha priviléjiu atu serbisu hamutuk ho komunidade lokál.
“Misaun Dentál iha ne’e la’ós de’it kona-ba númeru nehan ne’ebé ami hasai. Komunidade lokál sira nia laran-di’ak no tradutór sira serbisu hamutuk ho ami. Esforsu kolaborativu ida-ne’e fó hanoin mai ami katak asaun kura ne’e sempre hanesan kolaborasaun husi parte rua,” Dr. Loh, dehan.
Nune’e mós, Diretora Komunidade St. Mary Mazzarello iha Venilale, Irmán Carolina Maria Correia, FMA, hateten, misaun ne’e signifikativu tebes ba labarik sira.
“Karidade mak fuan ba ita-nia fiar. Benefisiáriu sira mak estudante sira ne’ebé presiza tratamentu orál, sira mak iha esperansa boot ba futuru. Sira tenke sente katak sira hetan domin,” nia Irmán, tenik.
Nia hatutan, “Imi nia prezensa halo momentu ida-ne’e sai espesiál liután. Hatudu imi-nia domin no imi-nia besik ba povu Timor-Leste liuhusi povu Venilale. Ida-ne’e fó hanoin mai ita katak ita la mesak.”
Misaun Dentál NUS hanesan ezemplu di’ak kona-ba ligasaun ema ba ema ne’ebé buras entre Singapura no Timor-Leste.
TATOLI
