Servisu Migrasaun aplika ona multa ba empreza sia
DILI, 17 Setembru 2026 (TATOLI)—Servisu Migrasaun aplika ona multa ba empreza entertaimentu sira tanba kontrata sidadaun estranjeiru ho vistu turista serbisu iha fatin karaoke, bar no konstrusaun.
Diretór Servisu Migrasaun Komisáriu Asistente Polísia Jorge Monteiro, esplika, bazeia ba Lei Migrasaun Azilu, bainhira iha empreza ou indivíduu ruma ne’ebé transporta ema estranjeiru mai serbisu iha territóriu nasionál Timor-Leste, espesialmente ho vistu turizmu, normalmente aplikasaun multa ba indivíduu ne’ebé transporta mai hodi hala’o empreza nia serbisu inklui empreza ne’e rasik.
“Husi Janeiru to’o Agostu 2026 kuaze iha empreza nove mak ita fó sasaun administrativa haruka aplika multa hanesan karaoke, bar, no fatin konstrusaun ne’ebé inklui indíviduu ne’ebé empreza ne’e kontrata mai serbisu ita mós prega multa hotu,” Jorge Monteiro hateten ba Jornalista sira liuhusi konferénsia imprensa ne’ebé hala’o iha edifísiu Servisu Migrasaun, Vila-Verde, Kinta ne’e.
Notísia relevante : Servisu Migrasaun kontribui millaun $2-resin durante fulan-ualu
Nia dehan, ba sidadaun estranjeiru ne’ebé uza sala vistu turizmu ba halo atividade negósiu ka serbisu ne’e iha obrigasaun selu multa $200 to’o $450.
“Maibé ba empreza ka indivíduu ne’ebé mak kontrata ka lori ema estranjeiru mai serbisu iha nia empreza karaoke ka bar ho vistu turizmu sei selu $750 to’o $1.500,” nia akresenta.
Aplikasaun multa la’ós iha fatin karaoke no bar de’it, maibé ba empreza seluk hanesan konstrusaun.
“Durante ne’e ba empreza estranjeiru tantu empreza lokál, ne’ebé lori traballadór estranjeiru mai ita-nia territóriu nasionál Timor-Leste ho vistu turizmu, maibé empreza lori hodi halo serbisu ita aplika multa ba traballadór ho vistu turista ne’e nomós aplika multa ba empreza ne’ebé lori ou transporta pesoál ne’e tama iha ita-nia territóriu nasionál Timor-Leste,” nia katak.
Jornalista : Natalino Costa
Editora : Julia Chatarina
