Servisu Migrasaun kontribui millaun $2-resin durante fulan-ualu
DILI, 17 Setembru 2026 (TATOLI)—Servisu Migrasaun kontribui ona reseita $2.945.350 durante fulan-ualu, hahú Janeiru to’o Agostu tinan ne’e, ne’ebé reseita hirak ne’e mai husi aplikasaun vistu.
“Durante Janeiru to’o Agustu Servisu Migrasaun rejista sidadaun estranjeiru ne’ebé tama iha iha territóriu nasionál Timor-Leste hamutuk na’in-282.304,” Diretór Ezekutivu Servisu Migrasaun, Komisáriu Asistente Polísia Jorge Monteiro, informa ba Jornalista sira liuhusi konferénsia imprensa ne’ebé hala’o iha Vila-Verde, Kinta ne’e.
Husi ema nain-284.304 ne’e, Janeiru iha 34.012, Fevereiru iha 27.364, Marsu iha 31.739, Abríl iha 34.895, Maiu iha 35.917, Juñu iha 40.302, Jullu iha 42.017, no Agostu iha 36.058.
“Ema estranjeiru ne’ebé tama iha ita-nia territóriu nasionál Timor-Leste mai husi nasaun hamutuk-186,” nia akresenta.
Notísia relevante : Servisu Migrasaun emite vistu turista 135.170 durante fulan-ualu
Indonézia sai nasaun ne’ebé okupa númeru dahuluk ein termu nia sidadaun vizita iha Timor hamutuk ema na’in-82.193, Repúblika Populár Xina 11.340, Austrália 7.312, Portugal 6.236, no Filipina 1.682.
Estadus Unidus Amérika iha 1.640, Malázia iha 1.499, Índia 1.439, Japaun 1.247, Singapura 1.083. Reinu Unidu 886, Vietname 728, Koreia Súl 608, Nova Zelándia 428, Alemaña 405, Fransa 402, Rúsia 184, Israel 60, Repúblika Islam Iran 12, Turkia 11, Suriname 11.
Servisu Migrasaun mós rejista ema estranjeiru na’in-278.624 sai husi territóriu nasionál hahú husi Janeiru to’o Agostu.
“Ne’ebé sidadaun tama no sai ne’e iha balansu, ita haree husi númeru ne’ebé tama-sai,” Komisáriu Asistente Monteiro, tenik.
Husi sidadaun estránjeiru sira ne’ebé tama iha territóriu nasionál ne’e maioria ho vistu turista no tuir fali vistu traballu, vistu rezidénsia permanente no vistu negósiu.
Jornalista : Natalino Costa
Editora : Julia Chatarina
