Servisu Migrasaun kontinua tau-matan ba arguidu na’in-131 husi krime scam call center
DILI, 17 Setembru 2026 (TATOLI)—Servisu Migrasaun to’o agora kontinua tau-matan ba arguidu na’in-131 husi krime scam call center ka burla informátika tanba sira ne’e submete hela ba prosesu judisiál.
Diretór Ezekutivu Servisu Migrasaun Komisáriu Asisténte Polísia Jorge Monteiro, hateten, Servisu Migrasaun simu orden husi Tribunál Primeira Instánsia Dili hodi bandu sidadaun estranjeiru sira ne’e labele sai husi territóriu nasionál Timor-Leste.
“Sidadaun estranjeiru sira ne’e kompostu husi Repúblika Xina hamutuk 75 no Repúblika Indonézia 56, orden ne’ebé sai husi Tribunál hodi bandu labele sai husi territóriu nasionál. Tribunál fó orden ba servisu Migrasaun atu kontrola no bandu sira labele sai tanba sira sei iha prosesu judisiál ne’ebé sira nesesita enfrenta,” Jorge Monteiro hato’o ba Jornalista sira liuhusi konferénsia imprensa ne’ebé hala’o iha nia knaar fatin, Vila-Verde, Kinta ne’e.
Notísia relevante : Servisu Migrasaun kontribui millaun $2-resin durante fulan-ualu
Nia dehan, tuir Lei Migrasaun Azilu artigu 84 númeru 4 define no mensiona ho klaru katak karik iha prosesu judisiál ruma ba ema estranjeiru ne’ebé komete krime iha territóriu nasionál Timor-Leste, karik Juíz la aplika Prizaun Preventiva, tenke informa ba Servisu Migrasaun atubele halo prosedimentu administrativu supervizaun no kontrola.
“Relasiona ho informasaun sira iha rede sosiál, dala ruma mós iha mídia, televizaun ita rona iha fulan ida ka rua kotuk katak iha sidadaun estranjeiru hamutuk 143 halai sai husi territóriu nasionál Timor-Leste. Pesoalmente no nu’udar Diretór Ezekutivu Servisu Migrasaun ha’u atu hateten katak ha’u laiha informasaun serteza kona-ba informasaun ida-ne’e,” nia hato’o.
Servisu Migrasaun simu orden husi Tribunál katak fiskaliza no motorizada ba arguidu envolve scam call center ne’ebé aplika medida hodi bandu proibisaun auzénsia.
“Servisu Migrasaun simu notifikasauun ka simu orden husi Tribunál atu kontrola iha postu fronteira sira husi territóriu nasionál Timor-Leste. Kontrola no fikaliza ne’ebé Tribunál bandu atu labele sai husi territóriu nasionál, tanba ne’e servisu Migrasaun garante katak sira la sai, atualmente sira seidauk sai tanba ami halo fikalizaun kada loron lima-lima ba sira-nia hela fatin hodi garante katak sira mantein nafatin,” Diretór hato’o.
Jornalista : Natalino Costa
Editora : Julia Chatarina
