Sidadaun estranjeiru na’in-311 viola vistu iha fulan-ualu ikus
DILI, 17 Agostu 2026 (TATOLI)—Servisu Migrasaun rejista ema estranjeiru hamutuk na’in-311 halo ona violasaun vistu durante Fulan-Janeiru to’o Agostu tinan ne’e.
Diretór Ezekutivu Servisu Migrasaun, Komisáriu Asistente Polísia Jorge Monteiro, esplika, violasaun vistu ne’e bainhira sidadaun estranjeiru ida tama ho vistu turizmu maibé sira halo serbisu no atividade negósiu iha Timor.
“Sira la’ós ba turizmu, sira utiliza ba fali ba atividade negósiu no traballu, ho nune’e aplika medida no normalmente ita tuir prosedimentu hodi prosesa sira tuir Lei Migrasaun Azilu nian. Liuhusi operasaun no fikalizaun ita aplika koima ba sira hodi selu violasaun vistu,” Diretór hateten ba Jornalista sira liuhusi konferénsia imprensa ne’ebé hala’o iha, edifísiu Servisu Migrasaun, Vila-Verde, Kinta ne’e.
Notísia relevante : Servisu Migrasaun kontinua tau-matan ba arguidu na’in-131 husi krime scam call center
Nia dehan, durante ne’e Servisu Migrasaun fó sansaun administrativu ba estranjeiru ne’ebé viola vistu. Balun ne’ebé kumpre selu sansaun administrativa hanesan selu multa no selu koima, ba sira ne’ebé la selu Migrasaun aplika abandona voluntária husi territóriu nasionál Timor-Leste.
“Ita-nia multa ba violasaun vistu entre $200 to’o 540. Iha multa tuir Lei Migrasaun Azilu ne’ebé mensiona katak ita aplika sasaun ka multa tuir mós sira-nia kondisaun. Ba sira ne’ebé laiha posibilidade atu selu ita aplika hotu abandona voluntária husi territóriu nasionál Timor-Leste,” nia akresenta.
Jornalista : Natalino Costa
Editora : Julia Chatarina
