SEFOPE-Japaun deside atu troka programa TIT ba fali ESD
DILI, 18 Setembru 2026 (TATOLI)-Sekretária Estadu Formasaun Profisionál no Empregu (SEFOPE) hala’o enkontru ho delegasaun husi Japaun, Antigu Embaixadór Iwao Kitahara, konsultan jerál Timor-Leste ba Japaun, Horose Kaneaki no ajénsia foun rua OISCA no Sainokuni Takumi Business Cooperative Association, diskute hodi deside kona-ba Programa Technical Intern Training (TIT) ne’ebé atu troka fali ba Employment Skill Development Program (ESDP).
Asesór Sekretária Estadu Formasaun Profisionál no Empregu, Ilídio Ximenes da Costa, hateten objetivu husi programa ne’e mak haruka joven sira sai ba servisu iha Japaun no daudaun ne’e timoroan sira-ne’ebé servisu iha Japaun liuhusi programa ne’e hamutuk na’in-86.
Nia hateten, daudaun ne’e iha tan preparasaun atu haruka tan timoroan purvolta na’in-50 ne’ebé tuir ona teste no daudaun ne’e partisipa hela formasaun lian Japaun iha Sentru Formasaun Bekora.
“Programa TIT ne’e iha planu muda fali ba ESDP, ne’ebé mak agora daudaun iha hela prosesu nia laran. Horisehik delegasaun sira-ne’e halo vizita hasoru SEFOPE, hodi fó koñesimentu kona-ba ajénsia foun rua ne’e,” Asesór SEFOPE ne’e relata ba Agência Tatoli husi telefónika, ohin.
Tanba ne’e, nia hato’o agradesimentu ba OISCA ne’ebé mak loke sira-nia sentru formasaun iha Japaun no durante ne’e simu timoroan na’in-neen mak ba tuir formasaun durante tinan ida. Ema hirak-ne’e, balun servisu ona iha kompañia, ONG Japones nian iha Timor no ida mak servisu iha TIT Japaun.
“Ida-ne’e hatudu progresu di’ak atu fó oportunidade ba joven sira hodi ba servisu iha Japaun. Signifika, sira la’ós fasilita de’it formasaun maibé mós loke espasu ba servisu,” Antigu embaixadór Timor-Leste iha Japaun ne’e esplika.
Tanba ne’e, n ia fó rekomendasaun na sira atu ba oin bele halo kooperasaun mós ho SEFOPE hodi halo preparasaun di’ak liután ba formadór timoroan sira, liuliu iha àrea agrikultura nian liuhusi programa TIT.
Tanba ne’e, nia hato’o apresiasaun no agradesimentu ba ajénsia foun rua ne’ebé rekruta ona joven na’in-neen (6) hodi ba tuir programa TIT iha Ibarakhi prefecture Japaun no mós ajénsja OISCA hatudu ona ninia kompromisu atu envolve-an mós iha programa foun ESDP iha futuru mai.
“Ho nu’une, hatudu katak iha progresu di’ak no oportunidade ne’ebé ita presiza hadi’a no kompleta tan buat balun ne’ebé iha hodi hakat ba oin,” nia dehan.
Enkuantu, kritéria atu ba servisu iha Japaun liuhusi programa TIT ka ESDP ne’e kandidatu tenke hatene lian Japaun no mós tenke koñese ema-nia kultura.
Jornalista : Alexandra da Costa
Editór : Cancio Ximenes
