Husi Ningde, empreza CATL habelar inovasaun transporte elétriku liuhusi teknolojia bateria 

NINGDE (XINA), 20 Setembru 2026 (TATOLI) – Empreza Contemporary Amperex Technology Co. Limited (CATL), nu’udar emprea líder iha teknolojia bateria, iha Xina, kontinua no habelar aplikasaun bateria ba veíkulu elétriku, ró, veíkulu pezadu no aviasaun, hanesan parte husi esforsu atu apoia dezenvolvimentu futuru transporte bazeia ba enerjia foun.

Avansu teknolójiku ne’ebé empreza ne’e halo observa direta husi delegasaun jornalista sira husi nasaun ASEAN durante vizita bá CATL iha Ningde, Provínsia Fujian, iha Domingu, loron daruak husi série Workshop Media ASEAN nian ne’ebé hala’o iha rejiaun ne’e.

Durante vizita, jornalista sira haree teknolojia bateria oioin no produtu sira ne’ebé dezenvolve husi CATL, no mós sira-nia aplikasaun sira iha modu transporte oioin, liuliu veíkulu elétriku sira.

Delegasaun ne’e mós simu informasaun kona-ba dezenvolvimentu bateria jerasaun tuirmai ne’ebé dezeña atu habelar alkanse veíkulu nian enkuantu aselera tempu karregamentu nian. Teknolojia CATL balun permite veíkulu sira atu hetan kilómetru atus ba atus husi alkanse adisionál husi minutu balun de’it husi karregamentu.

CATL nia dezenvolvimentu bateria la limita ba karreta de’it. Kompañia ho sede iha Ningde mós habelar hela nia utilizasaun ba nia teknolojia bateria nian ba ró elétriku sira, veíkulu pezadu sira, sistema sira troka bateria nian, no setór aviasaun no transporte ho altitude ki’ik.

Iha setór marítimu, ró elétriku liu 1.000 ne’ebé ekipadu ho sistema bateria CATL hala’o ona operasaun. Kompañia nia sistema bateria tasi nian mós hetan ona sertifikasaun husi sosiedade klasifikasaun boot lima iha Xina, Estadu Unidu, Noruega, Fransa, no Itália.

CATL mós dezenvolve hela solusaun integradu sira zero-karbonu nian ba setór ró nian ne’ebé liga ró sira, instalasaun sira iha rai-maran, no sistema dijitál sira.

Iha setór aviasaun nian, empreza hahú ona habelar peskiza no dezenvolvimentu bateria nian hodi apoia aviaun elétriku no veíkulu elétriku sira ba dezlokasaun no aterrizajen vertikál (eVTOL, sigla inglés).

Iha 2025, bateria versaun karga nian ne’ebé dezenvolve husi CATL ba AutoFlight liu ona Revizaun Konformidade Fabrikasaun nian ne’ebé hala’o husi Administrasaun Aviasaun Sivíl Xina nian no hetan sertifikasaun sistema kualidade aviasaun AS9100D. Iha tinan hanesan, eVTOL ida ho tonelada lima ne’ebé deskreve husi empreza hanesan boot liu iha mundu kompleta nia vou públiku dahuluk.

Iha vizita ne’e, sira hatudu mós ba jornalista sira progresu husi kolaborasaun sira CATL nian ho fabrikante veíkulu internasionál oioin, inklui BMW, Honda, no empreza veíkulu elétriku lubuk sira seluk.

CATL maka empreza teknolojia enerjia foun ida ne’ebé envolve iha peskiza no dezenvolvimentu, produsaun, no fa’an bateria enerjia no bateria armazenamentu enerjia. Kompañia ne’e lista ona iha Bolsa Shenzhen dezde 2018 no iha Hong Kong Exchanges and Clearing Limited dezde Maiu 2025.

To’o ohin loron, CATL estabelese no opera ona baze fabrikasaun bateria hamutuk 28 iha mundu tomak. Ninia rede servisu nian hale’u nasaun no rejiaun 88, ne’ebé hetan apoiu husi estasaun servisu pós-venda liu 1.300.

To’o Juñu 2026, volume instalasaun globál kumulativu husi bateria enerjia CATL nian ultrapasa ona unidade millaun 28.65, ho nia produtu sira ne’ebé komersializa iha nasaun no rejiaun 74.

Tuir dadus empreza nian ne’ebé sita husi SNE Research, CATL kaer kuota merkadu globál porsentu 39,2 ba utilizasaun bateria veíkulu elétriku nian iha 2025, mantein pozisaun aas liu ba tinan neen tuituir malu husi 2017 to’o 2025.

Pozisaun ida-ne’e hametin liután iha 2026. Husi Janeiru to’o Maiu tinan ne’ebá, CATL nia kuota merkadu globál ba bateria veíkulu elétriku nian atinje porsentu 40,2, enkuantu nia kuota merkadu iha li’ur Xina nian maka porsentu 33,7.

Inovasaun sai hanesan pilár xave ida ba dezenvolvimentu empreza nian. CATL opera sentru peskiza no dezenvolvimentu neen iha Ningde, Liyang, Shanghai, Xiamen, Hong Kong, no Munique, ho ekipa peskiza ida ho membru maizumenus 23.000, inklui titulár PhD hamutuk 745.

Ba 2025, empreza aloka ona yuan billaun 22,1 ba peskiza no dezenvolvimentu. Kumulativamente, investimentu R&D CATL nian durante tinan sanulu liubá ultrapasa ona yuan billaun 100.

Aleinde teknolojia bateria ba transporte, CATL dezenvolve armazenamentu enerjia intelijente, estasaun karregamentu no teste, sistema troka bateria veíkulu nian, mina intelijente lahó tripulasaun, no solusaun enerjia foun oioin.

Kompañia mós fó prioridade ba redusaun emisaun nian hanesan parte ida husi nia estratéjia ba tempu naruk. CATL deklara ona katak nia atinje neutralidade karbonu iha nia operasaun sentrál sira iha 2025 no hakarak atinje neutralidade karbonu iha nia kadeia valór tomak iha 2035.

Vizita bá Ningde halo parte iha série Workshop Media ASEAN nian ne’ebé hala’o iha Fujian iha loron 19 to’o 23 fulan-Setembru tinan 2026, tuir delegasaun nia kompletasaun atividade sira iha Guangxi.

Notísia relevante: Transformasaun Xiaqi: Husi moris iha ró bá moris di’ak iha rai-maran

Jornalista: Arminda Fonseca 

Editora: Maria Auxiliadora