Estudante 458 iha EBC Atuaben la hetan merenda eskolár tuir menu indikativu
BOBONARU,21 Setembru 2026 (TATOLI)-Implementasaun Programa Merenda Eskolár (PME) Ensinu Báziku Sentrál (EBC, sigla portugés) Atuaben, postu administrativu Bobonaru, munisípiu Bobonaru, la tuir menu indikativu ne’ebé Governu estabelese, tanba durante semana tomak, husi loron 14 to’o 18 Setembru ne’e, estudante na’in-458 konsumu de’it modo ho etu.
Koziñeira EBC Atuaben, Serafina Soares de Araújo, konfirma sira tein tuir ai-han ne’ebé ekipa fornesedora Movimentu kamponezes Timor-Leste distribui.
“Uluk EJP fó ami ne’e tuir menu, más agora MOKATIL prepara ne’e la tuir menu, tanba sira lori mai ne’e la to’o. Aluni sira han etu, maibé ai-fuan laiha, ho modo brinjela de’it. Ne’e sira han tanan semana ida, han na’an dala ida duni, maibé na’an ayam buras ne’e, sira mak lori mai. Ami uluk tein ne’e nunka halo labarik sira han ayam Bura”, nia informa ba Tatoli, segunda ne’e
Serafina subliña katak implementasaun merenda eskolár Setembru ne’e, ohin segunda (21/09) ne’e mak foin iha mudansa no tuir menu, maibé ai-fuan ho na’an la sufisiente.
“Ohin, sira han ho mostarda, senoura, bifi, ai-fuan, maibé husi ai-fuan ida fahe ba ema rua, la hanesan uluk. Sira haruka fahe tanba fó de’it hudi sasuit ualu, ne’e la to’o tanba alunus 458 kedas ne’e”, nia dehan.
Enkuantu, Ekipa Jestaun Programa (EJP) EBC Atuaben, Agusto Leite Morreira, esplika katak osan ba ai-fuan no mostarda la’ós entrega diretamente ba EJP, maibé hafoin prosesu pagamentu envolve levantamentu osan iha banku entrega kedas ba MOKATIL.
Augusto mós konfirma katak implementasaun PME iha Sentru Atuaben hahú ona desde loron 02 Setembru, maibé fornesimentu sasán balun la tuir menu indikativu.
EJP ne’e observa, iha semana kotuk, hahú husi loron 14 to’o 17 Setembru, modo-tahan ne’ebé fornese la varia tuir menu no konsumu estudante sira limitadu.
“Sira fornese foos, ita bele dehan katak di’ak, maibé ita hare fali ba modo-tahan no ai-fuan ne’e mak problema uitoan. Hahú husi dia 14 to’o 17, sira -ia modo-tahan ne’e seluk la’e, mak brinjela de’it, depois hahú husi ne’ebá ai-fuan bele han, maibé dalaruma hudi ki’ik, fahe ba na’in-rua. Uluk ami jere ne’e labarik ida iha direitu ba ai-fuan ida atu hudi ka saburaka mós tenke ida”, nia relata.
Menu indikativu lorloron ne’ebé Ministériu Edukasaun, Saúde no Ministeriu relevante sira estabelse mak hanesan segunda: etu, modo, na’an-bifi, mostarda, no hudi tasak. Tersa: Etu, manu-tolun, ai-farina tahan, no ai-dila tasak. Kuarta: Etu, modo koto-mean, na’an karau, no salada-fruta. Kinta: Etu no na’an, modo raba-raba, no sobremeza (es-buah) no sesta: Etu, modo tempe, taho (tofu), fore-xikote, no salada-fruta.
Tuir kalendáriu implementasaun, Programa Merenda Eskolár iha fulan-Setembru sei hala’o durante loron efetivu 20, enkuantu iha Outubru mós sei iha loron efetivu 20 neʼebé responsabliza husi MOKATIL ho montante orsamentu rihun $800.
Tinan ne’e, munisípiu Bobonaru hetan alokasaun anuál ba Programa Merenda Eskolár ho totál orsamentu millaun $1,841,68 hodi ezekuta ba loron efetivu 100-resin.
Notísia relevante: Deteta na’an dodok, EBC Victor Santa troka menu merenda eskolár
Jornalista: Sergio da Cruz
Editora: Maria Auxiliadora
