HNGV hahú halo selesaun dokumentu husi aplikante 8.084 ba vaga profisionál saúde

DILI, 21 Setembru 2026 (TATOLI)—Diretór Servisu Apoiu Diagnóstiku no Terapêutiku HNGV, Vidal Lopes, informa Hospitál Nasionál Guido Valadares (HNGV) halo selesaun ba dokumentu hamutuk 8.084 ne’ebé aplikante sira aplika ba vaga profisionál saúde, hahú husi Segunda (21/09) to’o 26 Setembru 2026.

Notísia Relevante: HNGV sei anunsia rekrutamentu ba profisionál saúde iha 07 Setembru

“Kona-ba vaga HNGV ne’ebé mak ita-boot sira akompaña hela ba faze dahuluk ne’ebé mak submete dokumentu ne’e, husi aplikante sira husi 07 to’o 18 Setembru ho numeru referénsia 22 no totál aplikante hamutuk 8.084. Vaga ne’e ita presiza hamutuk 478 maibé aplikante sira mai aplika liu ona númeru ne’ebé ita fó sai,” Vidal Lopes informa ba jornalista sira, iha nia kna’ar fatin HNGV, Bidau, ohin.

Selesaun dokumentu ne’e hala’o iha Komisaun Funsaun Publika (KFP) no ekipa juri hotu-hotu sei ba ne’eba, depois tuir mai prosesu selesaun dokumentu ne’e hotu, iha balun dokumentu la kompletu bele elemina hanesan balun la asina ka dokumentu balun la orijinál ida-ne’e kritériu mak sei manda.

Entaun, nia dehan, ekipa juri hotu-hotu sei haree ida-ne’e mak la prienxe kritéru mak automatikamente nia sei la liu iha faze dahuluk nian.

“Depois faze tuir mai mak sira ne’ebé mak liu ona selesaun dokumentu mak sei ba teste eskrita ne’e mos sei halao iha funasaun publika hodi asegura nia transparánsia hotu-hotu monitorizasaun husi funsaun publika. Ekipa juri ne’e kompostu husi HNGV, Ministériu Saúde no mós Komisaun Funsaun Publika. Kona-ba familiarizmu sei laiha ne’eba tanba ita la’o tuir prosedimentu normál hotu,” nia dehan.

Nia informa, iha vaga ne’e rasik, kriteiru define ona kona-ba esperiénsia Servisu fulan tolu ba leten tanba iha publikasaun ne’eba klaru ona.

“Ita planeia vaga refere bazeia ba ita-nia forsa orsamentu hotu. Se ita haruka ema servisu ita tenke selu ema, tanba ne’e vaga ne’e tuir planu ne’ebé mak iha ona, karik ba tinan oin mak iha lakuna balun, pois mak ita planeia no presiza tan rekursu hira,” nia relata.

Antes ne’e. Hospitál Nasionál Guido Valadares hahú halo rekrutamentu ba profisionál saúde hamutuk 478 ba públiku, hahú husi 07 to’o 18 Setembru 2026.

Tuir pájina ofisiál Hospitál Nasionál Guido Valadares ne’ebé mak TATOLI asesu katak, totál vaga ne’ebé mak publika husi Hospitál Nasionál Guido hamutuk 478. Husi númeru ne’e, Médiku Jerál Juniór A/1 hamutuk vaga 112, Infermajen Jerál Juniór A/1 hamutuk vaga 236, Infermajen Jerál Juniór B/1 hamutuk vaga 14, Asistente Infermajen Jerál hamutuk vaga 30, Parteira Jerál Junior A/1 hamutuk vaga 25, Parteira Jerál Junior B/1 hamutuk vaga 10.

Tékniku Radiologista, TDTSP Jerál, Juniór A/1 hamutuk vaga 10, Tékniku Analista Laboratório, TDTSP Jerál, Junior A/1 hamutuk vaga haat (4), Tékniku analista Banco de Sangue, TDTSP Jerál, Juniór A/1 hamutuk vaga tolu (3), Tékniku Fisioterapia, TDTSP Jerál, Juniór A/1 hamutuk vaga na’in-rua (2), Tékniku Biomedical, TDTSP Jerál, Juniór A/1 hamutuk vaga tolu (3).

Tékniku Nutrisaun TDTSP Juniór A/1 hamutuk vaga tolu (3), Tékniku Medical Record TDTSP Juniór A/1 hamutuk vaga haat (4), Tékniku Farmásia TDTSP Juniór A/1 hamutuk vaga lima (5), Tékniku Radiologista, TDTSP Jerál, Juniór B/ hamutuk vaga 12, Tékniku Fisioterapia, TDTSP Jerál, Juniór B/1 hamutuk vaga rua (2).

Tékniku Biomedical, TDTSP Jerál, Juniór B/1 hamutuk vaga rua (2), Refkrasionista, TDTSP Jerál, Juniór B/1 hamutuk vaga rua (2), Refkrasionista, TDTSP Jerál, Juniór B/1 hamutuk rua (2), Tékniku Medical Record, TDTSP Jerál, Junior B/1 hamutuk rua (2), Tékniku Farmacia TDTSP Jerál, Juniór B/1 hamutuk tolu (3), Asistente TDTSP hamutuk vaga rua (2).

Jornalista : Felicidade Ximenes

Editór        : Cancio Ximenes