IGEADI apoia ekipamentu pezadu normaliza estrada ne’ebé komunidade suku Uaitame ke’e ho liman
VIKEKE, 21 Setembru 2026 (TATOLI)—Institutu Jestaun Ekipamentu Apoiu Dezenvolvimentu Infraestrutura (IGEADI), destaka ona ekipamentu eskavatór iha Suku Uaitame, Postu administrativu Uatulari, Munisípiu Vikeke, atu normaliza estrada foun ne’ebé komunidade ke’e ho liman.
Koordenadór GEADI Brigada Daitula destakadu Baukau, Vikeke no Lautein, Marelino dos Santos Babo, servisu ne’e bazeia ba pedidu ne’ebé Autoridade Suku Uaitame hato’o ba direjente IGEADI atu apoiu ekipamentu.
“Normalizasaun estrada ida-ne’e Autoridade Suku Uaitame mak hatama proposta ba ami-nia superiór, entaun ami apoiu ekipamentu pezadu ke’e di’ak ba dalan ne’ebé ita-nia komunidade rasik ho liman,” Marelino ba jornalista sira iha serimónia kultura ba normalizasaun estrada husi Suku Uaitame liga bá Uailalika, Segunda ne’e.
Marcelino dehan normalizasaun ne’e sei hahú iha Segunda ne’e durante loron sanulu (10) nia laran iha Suku Uaitame.
Iha fatin hanesan, Xefe Suku Uaitame, Marelino Alves Pinto, hato’o agradesimentu ba IGEADI ne’ebé responde ona autoridade sira-nia pedidu hodi destaka ekipamentu pezadu ba Suku Uaitame normaliza estrada.
“Estrada ne’e ami ke’e hotu ona, maibé difikulta nafatin ba transporte sira asesu tanba rai balun sei aas, nune’e karreta tama ladún di’ak. Tan ne’e, ami husu ajuda ba IGEADI hodi tulun ami,” nia haktuir.
Nia informa katak estrada ne’e ho distánsia kilómetru rua-resin ne’ebé ekipa IGEADI sei ke’e di’ak rai aas sira-ne’ebé difikulta transporte sira, halo tohar ai sira-ne’ebé hamriik taka estrada no ke’e ezgotu nune’e bee bele sulin tuir.
“Tanba estrada ne’e ita loke ho obejetivu atu fasilita movimentasaun ba uma-kain hamutuk 55 (populasaun maizumenus 250) ne’ebé hela iha área Uailalika, ne’ebé kompostu husi Aldeia Makadike no Aldeia Foho-Manu. Durante ne’e, dalan úniku atu ba área Uailalika tenke liuhusi mota Bebui. Bainhira tempu udan, mota boot halo komunidade labele atravessa, to’o difikulta mós prosesu haloot mate-isin tanba semitériu públiku mós iha área ne’ebá. Aleinde ne’e ita fó espasu ba haki’ak animál tanba rai iha suku laran kloot ona. Komunidade balun hakarak muda sai ba área Uailalika atu bele haki’ak animál ho di’akliu,” nia hato’o.
Entretantu, serimónia kultura ne’e partisipa husi autoridade lokál Postu Uatulari, Polísia Nasionál Timor-Leste (PNTL) Eskuadra Uatulari, ekipa IGEADI no hetan partisipa másima husi komunidade Suku Uaitame.
Jornalista: Vitorino Lopes da Costa
Editór: Xisto Freitas da Piedade
