MKAE konsidera saláriu mínimu $160 la sufisiente ba nesesidade traballadór
DILI, 21 Setembru 2026 (TATOLI)—Koordenadór Jerál Ministériu Koordenadór Asuntu Ekonomiku (MKAE), Jorge Martins, konsidera desizaun kona-ba saláriu mínimu ho montante $160 la sufisiente ba nesesidade traballadór sira-ne’ebé servisu iha setór privadu.
MKAE sei halo análiza ba revizaun saláriu mínimu ho montante $160 no osan ne’e atu tun ka sa’e, maibé komprende katak ho montante $160 seidauk bele korresponde ba nesesidade traballadór sira-nian.
”Ami forma ona ekipa konjuntu entre SEFOPE, KSTL, SERVE I.P, MKAE no traballadór SEFOPE nian, entaun ekipa ne’e tenke servisu hotu (book-an) la’ós dun mai MKAE, matéria hotu tenke fahe mai atu MKAE halo nia parte,” Koordenadór Jerál MKAE ne’e relata iha nia fatin, ohin.
Tanba ne’e, nia dehan, MKAE hanesan fasilitadór de’it servisu hotu ne’ebé sei halo kompletu no inklui paraser ba jurídiku ne’ebé hodi akomoda input ne’e analiza husi makro no mikro-ekonómika nia.
“Nune’e sira sei prepara fali nota justifikasaun ida, atu nune’e bele briefing fali V-PM MKAE atu ba aprezenta iha Konsellu Ministru maibé nia aprezenta de’it, tanba matéria téknika hotu husi SEFOPE no KSTL mak hatene ho sira seluk ne’ebé involve iha CNT,” nia esplika.
Aleinde ne’e, nia hatutan, Parlamentu Nasionál mós preokupa ho asuntu ida-ne’e maibé ida-ne’e asuntu integradu. Tanba saida MKAE sei analiza revizaun saláriu mínimu ho montante $160, tanba sira komprende katak saláriu minimu ho montante $200 mós seidauk bele korresponde ba nesesidade traballadór.
Iha oportunidade ne’e Sekretáriu Estadu Formasaun Profisionál no Empregu, Rogério Araújo Mendonca, klarifika ba públiku katak ko’alia kona-ba saláriu mínimu ne’e kompeténsia iha Konsellu Nasionál Traballu (CNT) ne’ebé kompostu husi SEFOPE, CCITL no KSTL.
“Iha 2024, sira konsege lori ona proposta ne’e ba aprezenta iha Konsellu Ministru, maibé rekomendasaun KM katak SEFOPE presiza lori fila-fali proposta ne’e hodi halo konsultasaun públiku ho setór privadu, sindikatu, estatístika no makro ekonómia,” Sekretáriu Estadu ne’e hateten.
Governante ne’e dehan, papel importante ne’ebé sai hanesan baze fundamentál mak parte Estatístika ninia sondajen (survei) ne’e mak bele fó pareser ba iha CNT hodi prodúz fila fali alterasaun lei saláriu mínimu husi $115 ba iha $156.
“Maibé la to’o de’it iha ne’e, tanba husi Makro Ekonomia (MF) mós rekomenda bazeia ba dadus husi estatístika, signifika katak dadus hanesan. Entaun, hanesan Koordenadór MKAE ko’alia ne’e entermu polítika la’ós tékniku no sira-nia intervensaun la kondís ho lei ne’ebé SEFOPE prepara”, nia afirma.
Nia hatutan, tanba rekomendasaun husi Makro Ekonómia saláriu mínimu tenke to’o de’it $156, maibé SEFOPE deside aumenta ba $160, tanba se hakarak aumenta husi $160 ba leten sei fó impaktu ba inflasaun iha merkadu, folin produtu sira bele sa’e, empregadór bele redús númeru traballadór, nune’e bele mantein ho proposta refere.
Jornalista : Alexandra da Costa
Editór : Cancio Ximenes
