PNDS konstrui saladeaula rua no refeitóriu PME iha EBC Atuaben
BOBONARU, 21 Setembru 2026 (TATOLI) – Programa Dezenvolvimentu Nasionál Suku (PNDS) daudaun ne’e hala’o konstrusaun saladeaula rua no refetóriu ba Programa Merenda Eskolar (PME) ba Ensinu Báziku Sentrál (EBC) Atuaben, postu administrativu Bobonaru, munisípiu Bobonaru.
Adjuntu Diretór EBC Atuaben, Ángelo Martins Carlos, hatete katak konstrusaun edifísiu rua ne’e sai apoiu importante ba eskola, tanba antes ne’e EBC Atuaben hasoru limitasaun infraestrutura, liuliu falta saladeaula no espasu apropriadu ba estudante sira atu han merenda eskolár.
“Ami agradese tanba planu husi Governu ne’ebé kapa’as tanba haree ami-nia kondisaun eskola ladún favoravel. Tinan ne’e ami hetan edifísiu rua, primeiru refetóriu Programa Merenda Eskolár no segundu konstrusaun sala aula rua, obra rua ne’e seidauk 100%, maibé agora besik remata”, Ángelo Martins hateten ba Tatoli.
Nia esplika katak, falta saladeaula halo EBC Atuaben tenke implementa sistema turnu rua, ho turnu primeiru hahú husi 08:00 dadeer to’o 12:00 meudia, no turnu segundu husi 12:00 meudia to’o 17:00 lokraik.
Tuir nia, konstrusaun sala rua ne’e sei aumenta kapasidade infraestrutura eskolár, maibé seidauk sufisiente atu responde hotu ba nesesidade, tanba eskola sei presiza sala tan atu estudante sira bele aprende iha turnu ida de’it.
“Obra ida agora ne’e responde fazeadamente. Ami sei presiza tan hitu, haat iha eskola tuan ne’e no tolu iha leten ne’ebá iha espasu mamuk, atu kompleta ami-nia sala, nune’e estudante sira bele tama tuur dadeer hotu de’it”, nia dehan.
Relasiona ho konstrusaun refeitóriu PME, Ángelo hatete katak antes ne’e eskola hasoru difikuldade bainhira estudante sira simu merenda eskolár, tanba laiha espasu espesífiku atu sira han.
Nia hateten liuhusi konstrusaun refeitóriu foun, estudante sira sei hetan espasu ne’ebé apropriadu atu han merenda eskolár, enkuantu inan-feto sira ne’ebé tein merenda sei bele hala’o atividade iha kondisaun ne’ebé di’ak liután.
Maibé, nia dehan refeitóriu PME ne’e uza meia-parede, ne’ebé bele sai dezafiu bainhira tempu udan no anin boot.
“Se iha anin, udan-been bele tama ba sala laran. Dalaruma labarik sira tama no bele bokon. Ami hato’o ona rekomendasaun se bele taka buat ruma atu anin boot no udan-been labele tama ba laran”, nia dehan
Iha sorin seluk, Ángelo mós realsa katak edifísiu eskola tuan ne’ebé konstrui iha tinan 1980, durante tempu Indonézia, agora nia kondisaun deteriora ona no presiza atensaun.
Nia hatete EBC Atuaben submete ona proposta ba Ministériu Edukasaun atu halo konstrusaun ka reabilitasaun ba edifísiu tuan ne’e, no planu atu realiza iha 2027.
“Edifísiu ne’e ami halo ona reabilitasaun dala rua ho emerjénsia. Maibé, se presiza halo dala-ida tan, ha’u hanoin labele, tanba bele afeta ba labarik sira kuandu iha udan boot no anin, tanba simentu balu monu ona”, nia salienta.
Enkuantu, Ekipa Jestaun Programa (EJP) Merenda Eskolár EBC Atuaben, Augusto Leite Morreira, hatete katak refetóriu foun ne’e sei fó benefísiu ba estudante no inan-feto sira ne’ebé tein merenda eskolár.
“Obra konstrusaun refeitóriu eskola ne’e ami agradese tanba bele fó benefísiu ba estudante sira no mós ba ita nia inan-feton sira ne’ebé tein. Ami fiar katak ho obra ne’e labarik sira bele han ai-han merenda eskolár ho seguru no ijiene”, Augusto Leite Morreira dehan.
Ekstesaun sala rua ne’e gasta orsamentu $29.807,06 no konstrusaun sala refeitóriu gasta $15.860,80.
Totál estudante EBC Atuaben hamutuk 458 no profesor na’in-32, inklui seguransa.
Jornalista: Sergio da Cruz
Editora: Maria Auxiliadora
