PNTL fasilita Formasaun Téknika Polisiál ba investigadór CAC iha Akademia Komoro
DILI, 21 Setembru 2026 (TATOLI)—Polísia Nasionál Timor Lorosa’e (PNTL) no Komisaun Antí Korrupsaun (CAC-sigla portugeza), asina memorandu entendimentu atu realiza Formasaun Téknika Polisiál ba investigadór CAC iha Akademia Polísia Nasionál Timor-Leste, Komoro, Segunda ne’e.
“Formandu sira sei hetan programa formasaun ne’ebé relevante, atu aumenta sira-nia koñesimentu, kapasidade no prontidaun iha ezekusaun servisu,” Komandante Sentru Formasaun Polísia, Superintendente Polísia, Basílio de Jesus informa.
Nia subliña sentru formasaun konsidera importánsia kooperasaun no servisu integradu entre órgaun kompetente sira iha setór seguransa. Kooperasaun ida-ne’e importante atu prepara membru sira hasoru obstákulu no ameasa oioin ne’ebé bele mosu iha ezekusaun sira-nia responsabilidade.
Nune’e mós formasaun ne’e la’ós atividade ida-ne’ebé hala’o dala ida de’it, maibé prosesu kontinua atu fortalese kualidade, integridade no kapasidade profisionál husi membru sira.
Objetivu prinsipál mak atu prepara ema hotu-hotu atu kumpre sira-nia papel no responsabilidade iha instituisaun idaidak, tanba membru hotu mak servidór Estadu no servidór povu.
“Espera katak membru sira bele sai profisionál, disiplinadu no prontu atu hala’o responsabilidade hodi atende interese povu no Estadu,” Basílio tenik.
Aleinde ne’e, Komisáriu Komisaun Antí Korrupsaun, Rui Pereira dos Santos, dehan ohin iha atividade rua. Ida mak asina memorandu ba servisu konjunta no seluk mak abertura formasaun téknika polisiál ba investigadór CAC.
“Ohin ne’e, ita iha atividade rua. Dahuluk mak asina memorandu ho Komandu Jerál PNTL. Akordu ne’e abranje buat barak dezde tinan 2013 mai leten. Kuandu CAC halo buska sempre halo pedidu ba PNTL inklui ekipa CAC halo servisu iha munisípiu mak hetan impedimentu ruma. Seluk mak servisu konjunta ba rodoviáriu nian. No ita kontinua halo abertura formasaun téknika polisiál ba investigadór sira,” Komisáriu CAC subliña.
Komisáriu espera liuhosi formasaun ne’e bele hasa’e koñesimentu no kapasidade formandu sira nian liliu servisu iha terrenu. Tanba dalabarak halo buska CAC tenke halo pedidu mai Komandante Jerál hodi apoia pesoál polísia no servisu rodoviáriu loron-loron nian.
Nune’e mós, Komandante Operasaun Nasional PNTL, Komisáriu Asistente Armando Monteiro, husu formandu sira atu aproveita formasaun investigasaun referida.
“Hato’o apresiasaun no konfiansa ba formandu sira-ne’ebé partisipa iha formasaun iha Sentru Formasaun Polísia. Nune’e, husu atu aproveita didi’ak oportunidade ne’e hodi hasa’e kapasidade no abilidade iha área investigasaun kriminál,” nia informa.
Monteiro hatutan Sentru Formasaun ne’e sai nu’udár fatin ba membru PNTL sira atu aprende hamutuk, fahe esperiénsia no dezenvolve espesialidade tuir kompeténsia ne’ebé lei atribui ba polísia iha área investigasaun kriminál no tékniku pratika nian.
Nia mós hateten implementasaun Lei Organizasaun Investigasaun Kriminál no esperiénsia servisu iha área polisiál hatudu katak kooperasaun no komunikasaun entre membru PNTL sira importante tebes, liuliu iha prevensaun no kombate korrupsaun.
“Futuru mai, ita presiza iha kooperasaun no komunikasaun di’ak, hodibele hasa’e ita-nia servisu iha área prevensaun no kombate korrupsaun, no kontribui ba Governu no povu Timor-Leste,” nia afirma.
Iha formasaun ne’e, formandu sira sei simu matéria teoria no pratika. Parte importante husi formasaun mak atividade fízika, ne’ebé sei ajuda formandu sira prepara an atu hasoru situasaun difísil no agresiva durante ezekusaun servisu polisiál.
Iha biban ne’e, Komandu-Jerál apela ba formandu sira atu nafatin observa no komprende situasaun ne’ebé bele mosu iha operasaun, no uza formasaun ne’ebé simu atu hadi’a kapasidade profisionál.
“Parabéns no votu susesu ba formandu sira durante prosesu formasaun. Ho esperansa katak sira bele kompleta formasaun no filafali ba servisu ho kapasidade ne’ebé di’ak liután,” nia parabeniza.
Formasaun ne’e hala’o durante semana ida, hahú ohin. Formasaun referida 20% mak teoria no pratika iha 80%. Nia espera ho formandu sira-nia kompromisu katak sira esforsu ho ativu no másimu durante semana ida nia-laran.
Formandu hamutuk 27 maibé formandu balun iha atividade seluk no ida mak kondisaun la permite. Nune’e, ohin partisipa formasaun ne’e iha de’it na’in-23.
Jornalista: Osória Marques
Editór: Xisto Freitas da Piedade
