Postu Fatululik iha potensiál ba setór agrikultura no turizmu komunitáriu
KOVALIMA, 21 Setembru 2026 (TATOLI) – Administradór Postu Administrativu Fatululik, Felix Vicente, afirma katak postu administrativu ne’e iha potensiál iha setór agrikultura no turizmu komunitáriu, ne’ebé bele kontribui ba hadi’a ekonomia no moris-di’ak komunidade lokál.
Administradór ne’e hato’o deklarasaun ne’e iha edifísiu Administrasaun Postu Administrativu Fatululik, no esplika katak maioria komunidade iha área ne’e depende ba atividade agrikultura, inklui ortikultura, pekuária no floresta, nu’udar fonte rendimentu ba família.
“Komunidade iha Fatululik moris ho atividade agrikultura ne’ebé foka ba ortikultura, pekuária no floresta. Aleinde ne’e, ami mós iha potensiál iha setór turizmu komunitáriu,” Felix Vicente hato’o.
Nia esplika katak, iha setór ortikultura, komunidade produz ai-horis oioin, hanesan modo-tahan, koto, liis-mutin, liis-mean, saburaka, fore-keli no produtu seluk ne’ebé bele uza ba konsumu família no fa’an iha merkadu.
Iha setór pekuária, komunidade hakiak animál hanesan karau, bibi, kuda, fahi no manu lokál, ne’ebé sai fonte rendimentu no ajuda sustenta nesesidade loroloron família sira.
Aleinde ne’e, setór floresta mós iha potensiál, ho produtu hanesan ai-kameli, nu’u, bua no produtu floresta seluk ne’ebé komunidade bele uza no komersializa.
“Produtu hirak ne’e sai parte importante ba ekonomia família, tanba komunidade bele fa’an iha merkadu munisípiu hodi hetan rendimentu atu sustenta sira-nia família,” nia relata.
Felix Vicente hatutan katak, Fatululik mós iha potensiál iha turizmu istóriku no turizmu komunitáriu, ne’ebé bele dezenvolve atu atrai vizitante no turista no kria oportunidade ekonómia foun ba komunidade lokál.
Tuir nia, potensiál hirak ne’e presiza hetan atensaun no dezenvolvimentu, atu bele kontribui ba kresimentu ekonómia lokál no hadi’a komunidade sira-nia moris-di’ak.
Postu Administrativu Fatululik iha área luan aproximadamente 55 km², no fahe ba suku rua, mak Suku Fatululik no Suku Taroman, ho aldeia hamutuk ualu.
Suku Fatululik kompostu husi aldeia tolu, ho área luan 27,26 km², enkuantu Suku Taroman kompostu husi aldeia lima, ho área luan 27,64 km².
Iha aspetu jeográfiku, Fatululik situa iha parte oeste Munisípiu Kovalima, ho distánsia besik 30 km husi kapitál munisípiu. Postu ne’e iha fronteira ho Timor Osidentál, Indonézia, iha parte norte no baliza ho Postu Administrativu Maukatar iha parte leste no sul, no Postu Administrativu Fohorem iha parte oeste.
Bazeia ba dadus demográfiku, Postu Administrativu Fatululik iha populasaun totál ema 3.395, kompostu husi mane na’in 1.707 no feto na’in 1.688.
Notisia relevante: Komunidade suku Fatululik preokupa ho rede telekomunikasaun
Jornalista: Celestina Teles
Editór: Florencio Miranda Ximenes
