KOVALIMA, 02 Fevereiru 2026 (TATOLI)–Komunidade iha suku Fatululik, Postu Administrasaun Fatululik, Munisípiu Kovalima, preokupa tebes tanba to’o ohin loron la asesu rede telekomunikasaun,nune’e difikulta komunidade uza telefonika no asesu rede internet.
“Iha suku Fatululik ne’e, komunidade defisil atu asesu rede telekomunikasaun, nune’e difikulta komunidade uza telefone hodi kontaktu malu no susar asesu rede internet,” Administradór Postu Administrativu (APA) Fatululik, Elias da Cruz, hato’o preokupasaun ne’e iha salaun AMC-Suai, ohin.
Kestaun rede telekomuikasaun ne’e, Autoridade Postu ne’e dehan difikulta pesoál ofisiál suku atu update dadus monografia no demografia ba sistema.
“Ita hatene katak servisu administrasaun hotu-hotu depende ba rede, bainhira rede telekomunikasaun laiha afeta ba komunikasaun no la fasil atu asesu internet. Nune’e ita husu ba Governu atu koordena ho empreza operador sira hanesan Timor Telekom, Telemor no Telcomcel atubele responde kestaun rede telekomunikasaun ne’e,” APA ne’e sujere.
Postu Administrativu Fatululik, Munisípiu Kovalima iha Suku hanesan Fatululik no Suku Taroman ho nia aldeia Ualu mak hanesan Aldeia Taroman, Linain, Makous, Fatuloro, Holba, Beco Beidasi no Ai-toun ho totál populasaun 3.258.
Iha biban hanesan, Abitante Fatululik, Angelino do Carmo, reforsa katak durante ne’e komunidade sira difisil atu halo komunikasaun ba malu tanba rede telekomunikasaun laiha.
“Ha’u husu ba Governu presiza tau konsiderasaun ba ami nia preokupasaun kona-ba rede telekomunikasaun, nune’e oinsá atu fasilita ami hodi halo komunikasaun tanba durante ne’e ami atu telefone malu presiza buka rede mak foun bele telefone malu”, nia sujere.
Notísia relevante: Komunidade Ossouala susar asesu liña telekomunikasaun
Jornalista: Celestina Teles
Editór: Florencio Miranda Ximenes
