“Timor-Leste adere ona ba ASEAN maibé orden médiku seidauk iha”
DILI, 21 Setembru 2026 (TATOLI)—Médiku Intensivista iha Hospitál Nasionál Guido Valadares, Vidal Lopes, konsidera Asosiasaun Médiku Timor-Leste (AMTL) kria orden médiku ne’e importante tebes ba médiku sira tanba bele ajuda Ministériu Saúde.
“Kon- ba orden médiku hanesan profisionál saúde ida, konsidera Orden Médiku ne’e importante tebes, tanba daudaun ne’e Timor-Leste adere ona ba ASEAN maibé orden médiku iha Timor-Leste seidauk iha,” Médiku Intensivista iha HNGV, Vidal de Jesus Lopes, hateten iha nia kna’ar fatin, ohin.
Nia esplika, orden médiku ne’e hanesan orgaun reguladór ida hodi halo kontrolu ba profisionál saúde sira.
“Kria orden médiku ne’e, ba médiku sira mai ne’ebé halo servisu iha ospitál. Ita haree nia títulu no seluk tan maibé nia mak kontrola, seraké nia ne’e merese duni halo partika médiku, nia mak sei kontrola ida-ne’e. Karik médiku balun halo má-prátika ruma, entaun orgaun ida-ne’e mós bele halo nia papél hodi buka tuir nia kauza loloos, nia halo má-prátika iha área ida ne’ebé, atu Ministériu Saúde bele fó kompeténsia tuir nian sistema,” nia relata.
Nia mós hateten, orgaun ne’e importante tebes maibé tenke presiza lei ida hodi regula, nune’e orgaun ida-ne’e bele funsiona ho di’ak nomós ajuda Ministériu Saúde hotu, hodi haforsa sistema saúde.
Antes ne’e, Prezidente AMTL, Herculano Seixas, hateten oradór ida mai husi Malázia sei ko’alia kona-ba importánsia husi estabelesimentu orden médiku no halo advokasia ba estabelesimentu sira-ne’e hotu.
“Orden médiku ne’e importante tebes bele haree ona oinsá mak rejistu profisionál no prosesu lisensa prátika ne’e alineadu ho kritériu tékniku sira ne’ebé iha. Ita define kompeténsia médiku ida-idak nian, oinsá mak médiku sira prátika tuir sira-nia kódigu étika profisionál ne’ebé mak iha. Formasaun iha área ne’ebé de’it tenke mai ho uniformiza sira-nia an tuir padraun ne’ebé mak orden médiku sira iha, nune’e bele presta asisténsia ne’ebé mak kualidade di’ak ba ita-nia populasaun. Importánsia husi orden mediku ne’e mós atu foka ba formsaun kontinuada ba médiku sira iha área espesialista no sub espesialista,” nia dehan.
Nia esplika, médiku timoroan ne’ebé mak iha hamutuk 1.105 no husi númeru ne’e médiku espesialista hamutuk 142, no sira seluk ne’e balun médiku jerál, balun mestradu iha área saúde publika no balun dotoramentu.
Jornalista : Felicidade Ximenes
Editór : Cancio Ximenes
