Veteranu Relvas husu ba funsionáriu públiku atu serbisu ho disiplina no responsabilidade
ERMERA, 21 Setembru 2026 (TATOLI)–Veteranu José Varelha ‘Relvas’ iha ámbitu husu ba funsionáriu públiku sira atu serbisu ho disiplina no responsabilidade.
Veteranu ne’e hato’o lia hirak ne’e iha ámbitu loron funsaun públika ba dala-13, ne’ebé kada tinan sempre komemora iha loron 15 Jullu.
“Ha’u hanesan imi-nia maun, imi-nia tiun, imi-nia aman, atu husik hela mensajen badak hela iha fatin ida-ne’e, ha’u-nia mensajen mak ne’e, liuliu ba ha’u-alin sira, ha’u-nia oan sira ne’ebé mak hanesan funsionáriu públiku, tanba ita-nia rain ida-ne’e hodi ruin ho ran mak sosa, tanba ne’e husi ita-boot sira serbisu tenke iha disiplina no serví ho responsabilidade,” José Varelha hateten ba Jornalista sira iha Riheu, Segunda ne’e.
Notísia relevante : Família Saudozu Afonso Martins sujere ba Governu prezerva Uma Bribali nu’udar abrigu subar fatin
Nia nota, iha komemorasaun loron funsaun públika ba dala-13, rejista ona funsionáriu barak maibé públiku sei halerik ba atendimentu públiku, kompara ho FALINTIL sira ne’ebé ho númeru oituan maibé konsege manán funu.
“Tanba ne’e, hanesan ita funsionáriu, tenke disiplina no rai segredu, sekarik mak ami la rai segredu. Ami-nia ferik-oan, kona-ba nasaun nunka bele hateten ba nia. Ne’ebé ita-boot hanesan funsionáriu tenke disiplina no rona malu,” nia akresenta.
Veteranu ne’e hatutan: “Dalaruma ita bá ita-boot sira-nia kantor, ita-nia Xefe idade kiik hela, komu ita idade boot, ita dehan hanesan ne’e, ó ida labarik labele manda ha’u, maibé lae, tanba kbiit ne’ebé fó ba nia, nia bele labarik maibé bainhira Estadu fó fiar nia ita tenke tuir, irarkia ne’e ita tenke hakruuk ba nia.”
Nia haktuir, momentu iha tempu luta nian, FALINTIL sira tenke rona malu no kumpre oras, tanba ne’e mak bele lori prosesu luta to’o rohan.
“Se karik laiha ne’e ohin loron ami la hambriik iha ne’e. Iha funu ne’e disiplina importante, kuandu laiha halo ema mate barak. Tanba ne’e, kuandu buat hotu ita halo ho disiplina buat hotu sei la’o di’ak,” Veteranu ne’e motiva.
Komisaun Funsaun Públika (KFP) rejista iha tinan ne’e, funsionáriu hamutuk 75.894 iha administrasaun públika, kompostu husi membru Governu, funsionáriu permanente, ajente administrasaun, apontamentu polítiku, kazuál no kontratu termu sertu, asesór no konsultór husi nasionál no internasionál.
Husi númeru ne’e, funsionáriu permanente hamutuk 34.928 no ajente administrasaun públika 4.308.
Jornalista : Natalino Costa
Editora : Julia Chatarina
