FRETILIN defende kombate pobreza ne’ebé efetivu no inkluzivu iha Timor-Leste
DILI, 22 Setembru 2026 (TATOLI)-Deputada husi Bankada Frente Revolusionária Timor-Leste Independente (FRETILIN), Cristina Yuri Ribeiro, defende kombate pobreza iha Timor-Leste ho forma efetivu no inkluzivu liután, liuliu ba to’o área rurál.
Nia dehan katak Konsellu Ministru hetan ona aprezentasaun kona-ba publikasaun rezumu relatóriu pobreza iha Timor-Leste. Bazeia ba dadus Timor-Leste Survey of Living Standard (TLSLS) 2024, importante tebes tanba politika públika di’ak tenke bazeia ba evidénsia.
Nia salienta katak taxa pobreza nasionál tun husi 41,8% iha 2014 ba 37% iha 2024, maibé pobreza sei aas liu iha área rurál, ho 45,5%, kompara ho 18,4% iha área urbana.
“Redusaun ida-ne’e mak sinál pozitivu, maibé 37% sei reprezenta parte boot tebes husi ita-nia populasaun. Tanba ne’e, ita labele kontente de’it ho estatístika katak taxa tun. Ita tenke husu, tanba sá ema barak sei moris iha pobreza, no saida mak ita tenke halo diferente”, nia hato’o liuhusi reuniaun plenária Parlamentu Nasionál, ohin.
Nia dehan katak redusaun 4,8 % iha tinan sanulu bele haree katak prosesu redusaun pobreza presiza sai lalais, efetivu l no inkluzivu liután.
“Objetivu ita-nian labele simplesmente hein dékada barak atu pobreza tun, ita tenke aselera. Tanba ne’e, ha’u husu ba Governu atu fó prioridade ba empregu, produtividade rurál, agrikultura, formasaun profisionál, saúde, edukasaun no oportunidade ekonomia ba juventude no feto, liuliu iha área rurál”, nia dehan.
Tuir deputada ne’e, avaliasaun pobreza no ekuidade ne’ebé sei hala’o husi INETL ho Ministériu Finansa ho apoiu Banku Mundiál tenke uza duni atu identifika sé mak liuliu hela iha pobreza, iha ne’eb, tanba sá, no politika saida mak bele fó rezultadu konkretu.
“Ita nu’udar membru Parlamentu la mai atu krítika de’it. Ita mai atu fiskaliza, husu responsabilidade, no ajuda buka solusaun”, nia realsa
Deputada ne’e salienta katak Governu forte la’ós Governu ne’ebé la simu krítika. Governu forte mak rona, investiga, korrije bainhira presiza no garante katak lei aplika ba ema hotu. Tanba Timor-Leste luta kle’ur atu hetan liberdade, demokrasia no dignidade.
“Agora, responsabilidade ita hotu nian mak proteje liberdade, garante edukasaun ba labarik hotu, defende direitu sidadaun no halo esforsu ne’ebé konkretu atu hamenus pobreza”, katak.
Notísia relevante: Banku Mundiál klarifika taxa pobreza 71,7% ne’e dadus estimasaun la’os dadus serteza
Jornalista: Nelson de Sousa
Editora: Maria Auxiliadora
