Iha Foho Hituria Ermera, Xanana hato’o ba mundu Timor-Leste nia luta ba libertasaun

ERMERA, 22 Setembru 2026 (TATOLI)–Veteranu Luís António Salsinha ‘Ay-Ramo’ hateten, iha Foho Hituria ne’ebé lokaliza iha Postu Administrativu Ermera Vila, Munisípiu Ermera, Komandante Ein Xefe Forsa Armada ba Libertasaun Nasionál Timor-Leste (FALINTIL), Kay Rala Xanana Gusmão lee mesajen importante hodi transmite ba Nasaun Unidas no mundu kona-ba Timor-Leste nia luta ba libertasaun.

“Iha Fulan-Jullu, líder Xanana la’o-ain sai to’o bá Foho Hituria hodi apela ba mundu kona-ba sofrimentu ne’ebé povu Timor enfrenta. Apelu ne’e hato’o iha tinan 1991 iha foho ne’e. Nia ko’alia liu kona-ba Nasaun Unidas hanesan organizasaun potente ida-ne’ebé bele halo desizaun, tanba sá maka to’o agora Indonézia viola povu ida-ne’e nia direitu, la halo rezolusaun ruma kona-ba Indonézia hodi hapara nia funu,” Veteranu Luís konta tuir ba Jornalista sira bainhira lori ekipa jornada la’o tuir ain-fatin ba foho Hituria Ermera, Tersa ne’e.

Nia dehan, apelu seluk iha mota kuak tuun bá kraik ne’e, Komandante Xanana hato’o kona-ba tanba sá maka nasaun barak iha Eropa ne’e labele ko’alia atu halo asaun ruma hasoru Indonézia, tanba sira tama ne’e ilegalmente, kontra lei internasionál no Direitus Humanus.

“Gravasaun kona-ba apelu ne’e iha tuku 08:00 atu ba tuku 09:00 dadeer, Maun Xanana hamriik, ha’u maka sai hanesan Jornalista hodi halo gravasaun,” nia haktuir.

Notísia relevante : Ekipa jornada la’o tuir ain-fatin vizita subar-fatin Xanana no Konis iha Ai-Ceu Ermera

Luis António Salsinha Ay-Ramo hateten, Xanana fó mensajen ikus ba mundu internasionál, katak nia hakarak entrega-an ba Militár Indonézia nia liman hodi hakotu sofrimentu povu Timor-Leste nian.

“Ha’u ba entrega-an ba funu maluk Indonezia hodi habadak susar no terus ne’ebé povu rai ne iha, atu sira labele sofre tan, liurai boot na’in-tolu hatán ba, ha’u ba ona mate, labele fó mai, kastigu fó mai ha’u simu. Ikus mai sai realidade, Xanana hetan kapturasaun,” nia haktuir.

Iha fatin hanesan, Lucas da Conceição Salsinha ‘Kalohan Moruk’, dehan, foho Hituria maka sai fatin ne’ebé Xanana hamriik hodi hato’o nia mensajen ikus molok tun ba Dili hodi entrega-an ba Forsa Invazór sira.

Nia konta tuir, Xanana halo konseitu hodi nia rasik halo auto-determinasaun ikus iha ai-laran no kompromisu.

“Komandante Dudu hateten ba ha’u katak, Maun Xanana halo hotu hodi nia sama tiha fatuk lulik ne’e hodi halo kompromisu,” nia tenik.

Jornalista     : Natalino Costa

Editora          : Julia Chatarina