Merkadu Soso sei funsiona hanesan sentru fa’an animál iha Maliana
BOBONARU, 22 Setembru 2026 (TATOLI) – Autoridade Munisípiu Bobonaru (AMB) prepara merkadu Soso, iha postu administrativu Maliana, atu sai sentru fa’an animál ba komunidade no negosiante sira iha área munisípiu Bobonaru.
Prezidente Autoridade Munisípiu Bobonaru, Paulo Moniz Maia, hatete katak Maliana nu’udar sentru munisipál presiza merkadu ne’ebé di’ak atu fasilita komunidade sira buka moris liuhusi atividade komérsiu, inklui fa’an modo, sasán, roupa no animál.
“Maliana iha merkadu rua, Soso no Mau-Mali. Ami hakarak atu fa’an animál, husi manu to’o karau, konsentra iha merkadu Soso, enkuantu fa’an modo, sasán kioske no roupa bele hala’o iha merkadu Mau-Mali”, Paulo Moniz Maia informa ba jornalista sira, ohin.
Antigu deputadu ne’e hatete katak AMB sei buka meiu atu reorganiza merkadu Maliana, nune’e atividade komérsiu bele fahe ba merkadu Soso no Mau-Mali, tuir natureza sasán ne’ebé negosiante sira fa’an.
Nia mós subliña katak autoridade sei ko’alia ho komunidade ne’ebé hela ka uza rai estadu iha área ne’ebé planeadu ba dezenvolvimentu merkadu Soso, atu buka solusaun ne’ebé bele permite espasu merkadu sai luan no organizadu.
“Uma merkadu Soso ne’e halo kle’ur ona, maibé autoridade sira sesante ne’e ladún tau atensaun masima ba fatin ida-ne’e. Ne’ebé iha ha’u-nia tempu ha’u sei haree didi’ak, haree mós ita-nia komunidade ne’ebé utiliza hela rai Estadu, ami sei serbisu ho Terra no Propriedade, para identifika fatin ne’e. Se rai Estadu nian karik komunidade hela ne’e ami sei koalia, negosia ho sira, para sira bele muda, nune’e rai ne’e luan, tanba merkadu ne’e presiza fatin luan”, nia promete.
Iha sorin seluk, negosiante animál, Diamantino Leto Mau Bargança, hatete dadaun ne’e sira harii ona uma provizória hafoin hetan xamada husi autoridade postu administrativu Maliana atu muda atividade fa’an animál ba merkadu Soso.
Nia afirma katak negosiante sira organiza malu halo rasik uma-oan provizóriu iha merkadu Soso, hodi hein autoridade munisípiu Bobonaru kria kondisaun ne’ebé di’ak no dignu ba atividade negosiu iha futuru.
Notísia relevante: Merkadu Soso Maliana nakonu ho duut
“Ami nia hakarak mak fatin provizóriu ne’e prontu ona, foin ami muda mai. Maibé ami presiza Estadu kria kondisaun di’ak atu ami bele halo atividade negosiu iha fatin di’ak, luan”, nia hatete.
Nia realsa katak, atualmente, iha negosiante animál hamutuk na’in-32 ne’ebé sei hala’o atividade iha merkadu Soso, kompostu husi negosiante manu a’in 1-2, bibi 12 no restu grupu fa’an fahi.
Notísia relevante: Komunidade husu AMB funsiona merkadu Soso
Jornalista: Sergio da Cruz
Editora: Maria Auxiliadora
