Paviliaun Timor-Leste sai Mellor Paviliaun iha CAEXPO Nanning
NANNING, 22 Setembru 2026 (TATOLI)–Paviliaun Timor-Leste hetan rekoñesimentu hanesan Mellor Paviliaun iha China-ASEAN Expo (CAEXPO) ba edisaun tinan ne’e iha Nanning, Rejiaun Autonóma Guangxi, Xina.
Prémiu ne’e fó bazeia ba apresiasaun husi komité organizadora no vizitante sira kona-ba aprezentasaun produtu, dezign no interasaun negósiu ne’ebé Timor-Leste hatudu durante loron lima nia laran.
Durante espozisaun, Paviliaun Timor-Leste hatudu produtu lokál hanesan kafé organiku, vanila, ai-kameli no produtu artezanatu ne’ebé hetan atensaun maka’as husi emprezáriu Xina no nasaun ASEAN sira.
Asesór husi Ministériu Komérsiu no Indústria, Flavio Simoês, konsidera susesu ne’e hanesan pasu importante ba Timor-Leste hodi promove produtu lokál iha merkadu internasionál liuliu merkadu Xina ne’ebé boot.
“Ita hetan prémiu ba mellor Paviliaun iha CAEXPO hamutuk ho nasaun membru ASEAN rua tan hanesan Filipina no Myanmar. Ita hetan mellor tanba haree husi prespetiva arte nian, ita-nia Paviliun ne’e artistiku tebes, atrai tebes ema barak nia kuriozidade atu bele vizita. Ida-ne’e mak halo ita sai mellor,” Asesor Flavio hateten ba Tatoli iha ámbitu enseramentu CAEXPO iha Nanning, terea ne’e.
Nia dehan, Timor-Leste nia produtu uitoan maibé atrai tebes ema barak tanba paviliaun artistiku tebes hodi aprezenta produtu uitoan maibé atrai tebes ema atu mai vizita no sosa Timor-Leste nia produtu.
“Prémiu ne’e sira fó ba ita la’ós materiál maibé hanesan rekoñnesimentu ba ita-nia esforsu no saida mak ita halo durante ne’e. Ida-ne’e motiva tan ita atu halo di’ak-liu iha tinan oin. Ita agora mai ne’e hanesan nasaun primeiru partisipa tanba ita foin sai membru ASEAN ho preparasaun ne’ebé mínimu maibé ita konsege hatudu rezultadu di’ak,” nia dehan.
Partisipasaun Timor-Leste iha tinan ne’e hetan apoiu gratuita ba espasu paviliaun tinan rua husi Governu Guangxi, nu’udar parte husi kooperasaun komérsiu entre Xina no Timor-Leste.
CAEXPO tinan ne’e taka ofisialmente iha loron ohin no sei kontinua fali iha tinan oin ho partisipasaun boot liutan.
Jornalista : Hortêncio Sanchez
Editór : Cancio Ximenes
