Veteranu Lucas sujere Governu transforma Foho Hituria sai sítiu istóriku

ERMERA, 22 Setembru 2026 (TATOLI)–Veteranu Lucas da Conceição Salsinha ‘Kalohan Moruk’ husu ba Estadu atu transforma Foho Hituria sai sítiu istóriku.

“Foho Hituria sai hanesan fatin importante ida, husu ba entidade sira atu hadi’a no promove fatin ne’e sai fatin sítiu istóriku. Tanba ne’e, hato’o ba ulun-boot sira atu tau-matan iha fatin ida-ne’e atu nune’e bele promove netik fatin ida-ne’e nu’udar sítiu istóriku úniku iha Rejiaun IV,” Veteranu Lucas hato’o bainhira lori ekipa jornada la’o tuir ain-fatin FALINTIL bá vizita Foho Hituria, Ermera, Tersa ne’e.

Nia hatutan, mehi iha futuru mak transforma fatin sira ne’e hodi bele hatama reseita própria ba munisípiu. Antes ne’e, Veteranu sira hato’o ona pedidu ba atuál Primeiru-Ministru, Kay Rala Xanana Gusmão hodi hato’o ba Obras Públiku mai loke dalan.

“Halo fatin turístiku ida iha ne’e, atu líder Xanana, Maromak tulun bele mai tan iha fatin ida-ne’e hodi hatán ba kompromisu ne’ebé temi iha fatin ida-ne’e,” nia akresenta.

Notísia relevante : Iha Foho Hituria Ermera, Xanana hato’o ba mundu Timor-Leste nia luta ba libertasaun

Iha fatin hanesan, Eroi Vivo Luís Antonio Salsinha ‘Ay Ramo’, dehan, fatin ne’e presiza hadi’a tanba konsideradu hanesan fatin sagradu.

“Fatin ne’e povu, nasaun no istória, tanba ne’e presiza hadi’a,” nia akresenta.

“Iha buat rua ne’ebé importante, ida kona-ba istória, ida kona-ba fatin kulturál, tanba ne’e sira tenta atu rai hela memória iha fatin ne’e, sira tau osan uitoan-uitoan hamutuk halo tiha plaka ida,” nia tenik.

Veteranu ne’e dehan, Xanana mak asina plaka ne’e maibe seidauk realiza, nia títulu iha laran ne’e kurize ona iha Nunutali no agora sei rai hela seidauk iha dalan ba ida-ne’e.

“Tanba ne’e iha tempu ruma sira tenta nafatin atu kompleta plaka ne’e,” nia hato’o.

Jornalista     : Natalino Costa

Editora          : Julia Chatarina