SECoop lansa portál foun moderniza rejistu-atividade DRCCMD 2026 iha Timor-Leste
DILI, 23 Setembru 2026 (TATOLI)—Sekretária Estadu Kooperativa (SECoop, sigla portugés) lansa sistema website https://cooptl.com foun ne’e atu moderniza rejistu no bele ajuda tranzmite informasaun sira kona-ba Dili Regional Cooperative Conference Ministerial Dialogue no ASEAN Cooperative EXPO 2026 (DRCCMD), ne’ebé sei hala’o hahú husi 02-04 Outobru iha Timor-Leste.
Informasaun sira-ne’ebé bele asesu iha website ne’e mak kona-ba ninia notísia no atividade DRCCMD, dokumentu no relatóriu sira, galéria foto no vídeo, iha link no kontaktu.
Sekretáriu Estadu Kooperativa, Arsénio Pereira, hateten sira aplika sistema ne’e tanba agora era dijitál, tanba ne’e sira iha hanoin atu organiza eventu ne’e ho teknolojia hanesan rejistrasaun sei uza scan ba ID card partisipante sira-nian, nune’e hafasil SECoop atu halo relatóriu.
“Entaun konteúdu husi website ne’e integra ona infirmasaun kompletu kona-ba programa, ne’ebé fasíl ba ema atu asesu no ami mós garante sistema ne’e ninia seguransa,” Sekretáriu Estadu ne’e relata ba jornalista sira iha edifísiu SECoop Akait, ohin.
Governante ne’e hatutan, tanba bainhira iha faze halo rejistrasaun ba partisipante sira mak ho manuál, ne’e sei fó impaktu ba tempu (dada oras), bele difikulta ba atividade, tanba sei iha sesaun diskusaun lubuk ida mai prienxe durante atividade ne’e hala’o.
“Tanba partisipantes ne’e la’ós de’it husi Timor maibé envolve mós husi nasaun membru ASEAN nian no kada nasaun mai sempre lori sira-nia produtu hodi aprezenta iha espozisaun nian,” nia dehan.
Tanba ne’e, nia dehan, sira-nia preparasaun kuazé 90% ona no produtu ne’ebé sei lori bazeia ba rekursu potensiál husi kada munisípiu no partisipante ba espozisaun sira identifika kada munisípiu reprezenta ema na’in-lima no sira sei prepara fasilidade hotu hodi tau sira-nia produtu atu garante to’o loron tolu.
“Dadus totál grupu kooperativa ne’ebé rejistu iha ASEAN hamutuk 347.599 ho totál membru hamutuk millaun 66.6. Iha Timor-Leste, SECoop rejista grupu kooperativa hamutuk 277 ho ninia membru hamutuk 41,952,” nia relata
Ajenda programaDRCCMD
Bazeia ba ajenda ne’ebé Agência Tatoli asesu kona-ba programa DRCCMD 2026, sei abertura iha loron 02 fulan-Outobru, ne’ebé sei halo konferénsia ho tópiku kona-ba integrasaun ekonomia ASEAN; Polítika no enkuadramentu nasionál; Lideransa komunidade kooperativa no sei loke abertura ba atividade espozisaun.
Iha loron 03 fulan-Outobru, sira sei kontinua enkontru ministeriál; Enkontru bilaterál ho nasaun membru ASEAN; Talkshow no kontinua ho atividade espozisaun. Enkuantu iha loron 04 fulan-Outobru sei kontinua talkshow, espozisaun no seremónia enseramentu.
Jornalista : Alexandra da Costa
Editór : Cancio Ximenes
