Xefe Suku Rai-Merhei Ermera husu Governu reabilitasaun estrada Vila Maria bá Ai-Ceu
ERMERA, 23 Setembru 2026 (TATOLI)–Xefe Suku Rai-Merhei, Abel de Jesus Soares husu ba Governu aselera reabilitasaun estrada iha área Vila Maria bá Ai-Ceu, Aldeia Mate Restu, Suku Rai-Merhei, Postu Administrativu Ermera Vila, Munisípiu Ermera, tanba bainhira tempu udan difikulta komunidade nia movimentu.
Suku Rai-Merhei kompostu husi Aldeia Mate Restu, Domoo, Moris Foun, Timlele no Nazare, ho totál populasaun 2.000-resin.
“Suku ne’e ita preukupa liu mak dezenvolvimentu tanba dalan seidauk tama husi Vila Maria to’o iha área Ai- Ceu, ida-ne’e mak hanesan autoridade ha’u preukupadu, suku hotu dezenvolvimentu halo, suku ida-ne’e iha nia istória mas dalaruma dezenvolvimentu ne’e laiha,” Xefe Suku hato’o ba Ajénsia TATOLI iha Ai-Ceu, Kuarta ne’e.
Notísia relevante : Autoridade Bobonaru-Ermera loke ba públiku dalan foun ligasaun Soilesu-Obulo
Nia hatutan: “Fatin ne’e istóriku ba ita-nia Maun Xanana, maibé iha área jeografia ne’e mós liga bá suku mai Aldeia Mate Restu. Suku Rai-Merhei ne’e liga ba Suku Koaliati mas estrada ne’e ho kondisaun ladi’ak.”
Antes ne’e, Xefe Suku Rai-Merhei hasoru ona Primeiru-Ministru, Xanana Gusmão bainhira halo vizita iha suku ne’e no hato’o ona preokupasaun sira kona-ba estrada.
“Ha’u ejize tanba suku ida-ne’e suku istóriku mas tanba saida mak ami-nia dalan seidauk di’ak até a data, ita-boot sira haree, ida-ne’e mak ami preukupa,” nia katak.
Jornalista : Natalino Costa
Editora : Julia Chatarina
