BOBONARU, 16 Jullu 2026 (TATOLI) – Autoridade Munisípiu Bobonaru no Ermera, hamutuk ho lideransa komunitária, veteranu no komunidade, kinta ne’e halo inaugurasaun ba dalan foun ne’ebé liga husi Bee-Tudak Sibi, suku Soilesu, postu administrativu Bobonaru, bá aldeia Asularan, suku Obulo, postu administrativu Atsabe, ho distánsia kilómetru ida atu fasilita movimentasaun komunidade no impulsiona dezenvolvimentu iha área fronteira munisípiu rua.
Prezidente Autoridade Munisípiu Bobonaru, Paulo Moniz Maia, hateten suku Soilesu iha valór estratéjiku boot iha istória luta ba libertasaun nasional, no inisiativa komunidade atu loke dalan ne’e hatudu espíritu serbisu hamutuk ne’ebé merese fó apresiasaun.
“Agradese tebes ba inisiativa ne’ebé liurai, xefe aldeia na’in-sia, veteran sira, joventude, inan-aman sira. Ho imi-nia sakrifisiu no esforsu, imi konsege loke dalan kilómetru ida. La fásil atu ke’e fatuk boot, fera foho halo sai estrada hodi ita hotu ultrapasa”, nia hateten iha serimónia inaugurasaun ne’e.
Antigu deputadu ne’e hateten katak nia parte sei halo koordenasaun ho Servisu Munisipál Obra Públika, Programa Nasionál Dezenvolvimentu Suku (PNDS) no Projetu Planu Integradu Dezenvolvimentu Munisipál (PDIM) atu diskute possibilidade hadi’a infraestrutura ne’e iha futuru.
“Inisiativa ida-ne’e di’ak tebes. Depoiis ami fila, liurai, veteranu no komunidade sei tau prioridade nafatin ba obra ida-ne’e tuir planu suku nian hodi bá postu, bá Konsellu Koordenasaun Munisípiu, ami diskute atu bele tau iha prioridade”, dehan.
Xefe Suku Soilesu, Marito Victor da Costa, esplika katak komunidade hola inisiativa loke dalan foun ne’e atu fasilita movimentasaun ema no transporte ba atividade ekonomia, agrikultura, turizmu, kultura, no implementasaun programa governu hanesan PNDS.
Notísia relevante: Populasaun loke estrada foun liga suku Soilesu-Obulo no Lasaun
“Agora ita loke ona ba públiku. Ami hein katak iha futuru dalan ida-ne’e bele tau asphalt atu fasilita liután movimentasaun komunidade”, nia espera.
Nia mos hateten katak kultura serbisu voluntáriu atu loke estrada la’ós buat foun ba komunidade Soilesu no Obulo, tanba durante tinan barak sira kontinua serbisu hamutuk hodi hadi’a asesu no hametin relasaun entre komunidade rua.
Xefe Aldeia Soilesu, Antoninho Mauleto de Araújo, dehan serbisu loke dalan ne’e envolve ema liu 100 iha loron ida, no iha loron balun partisipasaun to’o ema 400 to’o 500.
“Ami hasoru difikuldade tanba fatuk boot no rai foho, maibé ho unidade no vontade forte, ami konsege loke dalan ida-ne’e. Agora, ami husu ba autoridade munisípiu rua atu kontinua tau matan ba obra ne’e hodi hadi’ak liután ba benefísiu komunidade”, nia sujere.
Servisu komunitáriu ne’e halao iha fulan-Marsu no finaliza iha Maiu, ne’ebé enbolve partisipasaun komunidade barak, hetan mós apoia fundu, ai-han no materiál seluk husi parte oioin.
Komunidade espera katak dalan foun ne’ebé liga Soilesu ho Obulo sei sai infraestrutura importante atu promove kreximentu ekonomia lokál, fasilita asesu ba serbisu báziku no hametin ligasaun sosiál entre komunidade iha munisípiu Bobonaru no Ermera.
Notísia relevante: Populasaun loke dalan foun 1,5km husi Soilesu bá Loubonu no Obulo
Jornalista: Sergio da Cruz
Editora: Maria Auxiliadora
