BOBONARU, 18 Maiu 2026 (TATOLI)-Komunidade ho inisiativa organiza malu loke estrada foun liga husi aldeia Ai-Aras, suku Soilesu, postu administrativu Bobonaru, bá suku Obulo no Lasaun, iha postu administrativu Atsabe, munisípiu Ermera.
Xefe Suku Soilesu, Marito Victor Pereirra, dehan populasaun sira ho voluntariamente halo estrada foun ne’e, tanba ida tuan iha tinan-tinan sempre afeta ba rai-halai no susar atu reabilita.
Notísia relevante: Populasaun Soilesu labele asesu bá instalasaun saúde no eskola iha tempu udan
“Diresaun ida-ne’e kuandu ita bá loos hetan danus tiha, risku loos atu hadi’a filafali. Entaun, komunidade balun oferese rai, sira kee rai durante loron tolu, loke dalan foun tanba tuan ne’e tinan-tinan akontese hela de’it dezastre naturál”, nia salienta ba Tatoli, iha Bobonaru, segunda-feira ne’e.
Autoridade ne’e esplika katak komunidade loke estrada foun ne’e atu fasilita movimentasaun ema, liuliu ba atividade ekoncmika, kultura, no seluk tan, inklui fasilita Programa Nasionál Dezenvolvimentu Suku (PNDS) iha suku viziñu sira.
“Dalan ida-ne’e tempu bailoro komunidade hotu-hotu liu. Estada ne’e mós alternativu, más agora dalan Maleubu ho Kolimau kotu totál ne’e mak sira liu fali iha ne’e tanba besik”, nia dehan.
Iha sábadu semana kotuk ne’e populasaun suku Soilesu no Obulo finaliza ona serbisu loke estrada foun husi bee-tudak Sibi bá Laubonu ho distánsia kilómetru 1,5, hafoin serbisu durante fulan ida-resin.
Notísia relevante: Komunidade Suku Soilesu Preokupa ho Estrada Ligasaun Suku ba Munisípiu Bobonaro
Jornalista: Sergio da Cruz
Editora: Maria Auxiliadora
