HAK husu Defensór Públiku fó atensaun másimu ba kazu rekluzu
KOVALIMA, 24 Setembru 2026 (TATOLI)- Asosiasaun HAK husu ba Defensór Públiku atu atende kazu prizioneiru sira ho seriedade no fó atensaun másimu ba sira-nia defeza jurídika hodi garante asesu ba justisa ne’ebé justu no transparente.
DDiretór Ezekutivu Asosiasaun HAK, Feliciano da Costa Araujo hateten katak Defensór Públiku tenke fó akompañamentu di’ak ba kliente sira ne’ebé hetan akuzasaun husi Ministériu Públiku no lori ba tribunál.
Nia afirma, akompañamentu jurídiku la’ós de’it bainhira kazu ida tama iha tribunál, maibé tenke kontinua bainhira prizioneiru sira kumpre pena ka hato’o reklamasaun kona-ba sira-nia direitu.
“Ami nia hanoin, akompañamentu labele to’o iha tribunál de’it. Bainhira sira lori reklamasaun ida tama mai iha prizaun ka kumpre sira-nia pena, sira bele akompaña atu entrega no hatene sira-nia situasaun. Akompañamentu ne’e la’ós de’it iha tribunál,” Feliciano informa ba jornalista bazeia ba monitorizasaun Asosiasaun HAK.
Aosiasaun HAK nu’udar parte husi rede ne’ebé servisu kona-ba asuntu prizaun dala barak halo diskusaun no fó rekomendasaun ba Defensór Públiku atu tau atensaun ba defeza prizioneiru sira.
“Ami mós faz parte rede iha prizaun nian ne’ebé kompostu husi MSSI, Defensór Públiku, Ministériu Justisa, inklui Provedoria Direitu Umanu hamutuk ho organizasaun sosiedade sivíl sira. Ita dala barak diskute no hakarak rekomenda nafatin, liuliu ba Defensór Públiku, atu fó atensaun ba sira-nia defeza,” nia dehan.
Feliciano mós husu atu Defensór Públiku halo vizita regulár ba prizaun, hodi rona diretamente preokupasaun no nesesidade jurídika husi prizioneiru sira.
“Vizita ne’e tenke regular hodi ita-boot sira bele husu sira-nia kondisaun no saida mak sira presiza atu tulun, liuliu ba ita-nia maluk sira iha Prizaun Preventiva atu nune’e sira bele hatene to’o bainhira loos mak desizaun definitivu sei to’o ba sira,” nia dehan.
Tuir Feliciano, HAK sempre rekomenda ba Defensór Públiku atu tetu no haree ho atensaun kazu prizioneiru sira, liuliu sira ne’ebé hela iha Prizaun Preventiva no hein desizaun definitivu.
“Defensór Públiku tenke tau atensaun másimu tanba imi-nia papel ne’e forte tebes atu garante justisa ida ne’ebé klaru no justu ba ita-nia maluk sira,” nia afirma.
Notisia relevante: PDHJ preokupa defensór públiku ladun vizita nia kliente sira iha prizaun
Jornalista: Celestina Teles
Editór: Florencio Miranda Ximenes
