PAM Ermera hamutuk instituisaun Estadu enserra atividade jornada la’o tuir ain-fatin FALINTIL iha Glenu
DILI, 24 Setembru 2026 (TATOLI)–Prezidente Autoridade Munisípiu (PAM) Ermera, José Martinho dos Santos Soares hamutuk ho instituisaun Estadu inklui Veteranu sira, Kinta ne’e, enserra atividade jornada la’o tuir ain-fatin Forsa Armada Ba Libertasaun Nasionál Timor-Leste (FALINTIL) ho tema “Hamatan ba Pasadu, hametin ohin, harii futuru”, ne’ebé realiza ona durante loron-haat nia laran, hahú 21 to’o 24 Setembru.
Entidade sira ne’ebé partisipa iha atividade me’e mak hanesan Provedoria Direitu Umanu no Justisa (PDHJ), Komisaun Funsaun Públika (KFP), Komisaun Antí-Korrupasaun (CAC), no Inspesaun Jerál Estadu (IGE) inklui Antigu Sekretáriu Rejiaun IV José Agostinho Siqueira ‘Somotxo’, veteranu balun no komunidade lokál.
Biban ne’e, Prezidente Autoridade Munisípiu Ermera, José Martinho dos Santos Soares, husu ba partisipante sira atu kuidadu, proteje no promove fatin istóriku.
“Autoridade Estadu, veteranu no veterana, líder lokál no joventude atu kontribui malu no fó oportunidade ba jerasaun foun atu aprende,” PAM Ermera hato’o iha intervensaun bainhira enserra jornada la’o tuir ain-fatin FALINTIL sira iha ámbitu komemorasaun loron nasionál Funsaun Públika ba dala-13 iha Glenu, Ermera, Kinta ne’e.
Notísia relevante : Ekipa jornada la’o tuir ain-fatin vizita subar-fatin Xanana no Konis iha Ai-Ceu Ermera
Nia dehan, fatin sira ne’ebé ekipa jornada la’o tuir nu’udar fatin patrimóniu Rstadu no povu Ermera nian.
“Depoizde jornada husi Mertutu, agora hamutuk iha Glenu, ha’u apresia unidade, família no difisiénsia sira ne’ebé sei anima ekipa jornada la’o tuir ain-fatin eroi sira ho dansa, tebe-tebe no banda múzika, imi-nia partisipasaun hatudu katak festa komunidade nian tenke loke fatin ba ema hotu,” nia reforsa.
PAM Ermera husu ba komunidade atu serbisu hamutuk ho Autoridade Munisipál ho interrese komún ba nasaun no povu.
“Respeita ita-nia istória, ajuda malu bainhira dezafiu sira mosu. Ha’u hato’o parabéns no agradesimentu boot, imi-nia istória kona-ba líder nasionál sira-nia abrigu iha tempu ba libertasaun, liliu iha Ermera hanorin jerasaun foun kona-ba sakrifísiu no valór ukun rasik-an, imi-nia testemóniu mak rikusoin ne’ebé presiza rona no fahe ba jerasaun foun sira,” nia tenik.
Atividade jornada la’o tuir ain-fatin FALINTIL realiza iha ámbitu komemora loron Komisaun Funsaun Públika ba dala-13 ne’e ho objetivu atu valoriza no dignifika eroi sira-nia luta no atu la’o tuir ain-le’ut eroi sira-nian, liuliu fatin sira ne’ebé Komandante Ein Xefe FALINTIL, Kay Rala Xanana Gusmão no Komandante Nino Konis Santana uza hodi reorganiza rezisténsia Timor kontra invazaun Indonézia.
Partisipante iha jornada ne’e la’o tuir mapamentu ne’ebé komisaun sira prepara ona husi Glenu Fatukeru bá Suku Riheu to’o Rezidénsia Nunutali, bá fali Lulilau to’o Rezidénsia Tidir.
Hafoin bá vizita fatin Rezisténsia Foho Hituria ba abrigu rezisténsia iha área Ai Ceu, nune’e ekipa kontinua bá vizita fatin rezisténsia Bairru Lisana liu ba Semetériu.
Kontinua bá vizita Abrigu Loblala, kontinua bá Abrigu Ersoi, nune’e kontinua ba Parokia Antigu, husi ne’e kontinua bá Ermera Antigu no kontinua bá kedan iha Abrigu Komandante Nino Konis Santana iha Mirtutu Ermera. Husi Mertutu ekipa jornada bá vizita fatin rezisténsia Bugasa no enserra iha Gleno Ermera.
Jornalista : Natalino Costa
Editora : Julia Chatarina
