RAEOA lansa bazar kalan atu promove produtu lokál ba sirkulasaun ekonomia  

OEKUSI, 25 Setembru  2026 (TATOLI) –   Autoridade Rejiaun Administrativa Espesiál Oekusi Ambeno (RAEOA), liuhusi Diresaun Servisu Rejionál Turizmu no Jestaun Merkadu, sesta ne’e abertura bazar kalan ho tema ‘Tempu Família Sira nian no Atu Koñese Ita nia Ekonomia Rasik’.

Seremónia lansamentu ne’e, partisipa direita mós husi Autoridade Timor Tengah Utara (TTU), ne’ebé lideradu husi Administradór TTU, Yosep Falentinus Delasalle Kebo.

Prezidente Autoridade RAEOA, Régio da Cruz Salu, informa, atividade bazar kalan ne’e sei implementa kada semana dalarua ba loron sesta no sábadu, ho objetivu atu promove ai-han lokál ho produtu lokál sira nu’udar poténsia Oekusi nian, nune’e bele sirkula ekonomia komunidade.

“Tema ne’ebé ita uza maka lesehan ka fatin konvivíu, fatin ba ita família bele gasta tempu sai ba liur  iha ambiente ne’ebé furak, atu hateten ba ita nia potensia no rekoñese ita-nia ekonómia rasik,  tempu mós ba inan no aman inklui oan sira hamutuk ho família, bele mai konvivíu iha paisajén ne’ebé furak, ne’e mak esensia husi lesehan ne’e,” nia hateten iha diskursu abertura, ne’ebé hala’o iha bairru Palaban, ohin.

Autoridade másimu ne’e, afirma, abertura ne’e nu’udar inísiu, faze tuirmai, Autoridade RAEOA sei hasai deliberasaun ho desizaun ida hodi régula fatin sira-ne’ebé hala’o atividade negósiu atu labele okupa espasu públiku inklui edifísiu públiku sira, maibé tenke konsentra iha fatin ida-ne’ebé Autoridade deside ona, nu’udar fatin ba ema hotu hodi fa’an no sosa.

“Semana oin Autoridade sei delibera fatin atu ita fa’an hahán, tenke loke to’o tuku 10:00 kalan iha estrada ibun tenke iha fatin ida, nu’udar fatin konvíviu, tanba durante ne’e ita barak iha uma de’it, entaun agora ba oin, tenke sai ona ho família, sesta lorokraik no sábadu lorokraik, tenke lori família mai han iha fatin sira-ne’e,” nia afirma.

Notísia relevante: MCI realiza bazar kalan hodi komemora loron mundiál mikro pequena media empreza

Bupati Timor Tengah Utara (TTU), Yosep Falentinus Delasalle Kebo,  konsidera atividade hanesan bazar kalan ho produtu komunidade, signifika hamoris komunidade sira-nia ekonomia. Tanba ne’e, nia dehan, ba futuru sei sai di’akliu tanba ekonomia komunidade kontinua sirkula iha rai laran espesialmente iha Oekusi.

“Bainhira nasaun atu la’o oin, ita rasik mak tenke hamoris ita-nia rejiaun rasik, momentum ida hanesan ne’e, kuandu iha Kefamenanu, dehan Empreza Mikro, Pequena no Media, ne’e destina ba sira ne’ebé iha negósiu individuál ka entidade emprezariál, hetan fatin, hetan lokalizasaun, hetan apoiu husi Governu, objetivu mak sirkulasaun ekonómika rejionál, ne’e maka oportunidade di’ak hanesan tema ne’ebé ohin mensiona, tanba ita mai hola sasán sira-ne’e, nia rezultadu mak hamoris ekonómia,” nia hateten.

Observasaun jornalista Ajénsia Tatoli,I.P, iha atividade bazar kalan ne’e, hetan partisipasaun másima husi grupu komunidade sira, hodi hatudu produtu sira hanesan Taís, ai-han lokál inklui jogu tradisionál sira.

Jornalista: Abílio Elo Nini

Editór: Rafael Ximenes de A. Belo