Komunidade husu Governu halo jestaun ba edifísiu Alfandega iha Fatululik
KOVALIMA, 28 Setembru 2026 (TATOLI) – Komunidade iha Postu Administrativu Fatululik, Munisípiu Kovalima, husu Governu atu buka solusaun kona-ba edifísiu Postu Integradu Alfandega ne’ebé konstrui ona kuaze tinan neen, maibé to’o agora seidauk uza.
“Edifísiu Alfandega ne’ebé iha Postu Administrativu Fatululik konstrui, kuaze tinan neen ,maibé to’o agora abandona hela. Ami husu atu buka solusaun atu edifísiu ne’e bele funsiona,” Abitante Umberto Noronha hatete ba jornalista iha Fatululik.
Tuir nian, edifísiu ne’ebé Governu konstrui ona tenke utiliza atu fó servisu ba komunidade no apoia atividade sira iha área fronteira.
Iha fatin hanesan, Administradór Postu Administrativu Fatululik, Felix Vicente, dehan postu integradu abandona kle’ur ona hanesan autoridade postu sei hato’o ba Ministériu kompetente hodi buka solusaun.
“Loos duni edifísiu la uza duni. Ha’u hanesan Autoridade postu ha’u sei submete proposta ba Ministériu kompetende atu buka solusaun,” nia dehan.
La utiliza tanba menus rekursu umanu
Hataan ba kestaun ne’e, Diretór Alfandega, Postu Integradu Fronteira Mota-Masin, Eusebio da Conceicão, klarifika katak,ho limitasaun rekursu umanu sai nu’udar dezafiu ba funsionamentu Postu Integradu Alfandega.
Atualmente funsionáriu Alfandega hamutuk na’in-16, inklui Diretór, ne’ebé fahe servisu ba Aeroportu Suai no Postu Integradu Mota-Masin.
Servisu fronteira envolve instituisaun oioin, inklui Migrasaun, Alfandega no Kuarantena, ne’ebé presiza koordenasaun entre instituisaun sira atu garante atendimentu ba ema sira ne’ebé tama no sai liu husi fronteira.
Bainhira ema tama liu husi fronteira, Migrasaun sei halo primeiru atendimentu no verifikasaun dokumentu pasaporte. Depois, Alfandega sei halo verifikasaun ba sasan ne’ebé ema lori tama, enkuantu Kuarantena responsavel ba kontrolu no verifikasaun tuir nia área servisu.
Tuir informasaun ne’ebé disponivel, Governu liuhosi Alfandega iha planu atu rekruta funsionáriu foun na’in 80. Rekrutamentu ne’e sei ajuda aumenta rekursu umanu no bele apoia funsionamentu servisu Alfandega iha postu fronteira sira.
Komunidade rekomenda atu autoridade kompetente halo koordenasaun ho ministériu relevante, atu buka solusaun ba edifísiu ne’ebé abandona no asegura katak infraestrutura ne’e bele uza tuir nia objetivu.
Notisia relevante:Alfándega Mota-Masin arrekada reseita $109.182 ba kofre Estadu
Jornalista: Celestina Teles
Editór: Florencio Miranda Ximenes
