iklan

COVALIMA, HEADLINE

Alfándega Mota-Masin arrekada reseita $109.182 ba kofre Estadu

Alfándega Mota-Masin arrekada reseita $109.182 ba kofre Estadu

Diretór Autoridade Aduaneira Covalima, Nuno Nogueira. Imajen Tatoli/Celestina Teles.

COVALIMA, 20 Juñu 2024 (TATOLI) – Alfándega Postu Integradu Mota-Masin, iha Tilomar, munisípiu Covalima, arrekada, entre Janeiru no Maiu, reseita hamutuk $109.182,28 ba kofre Estadu.

Diretór Alfándega Mota-Masin, Nuno Nogueira, informa katak reseita ne’ebé Alfándega kontribui durante fulan lima ne’e nia fonte mai husi importasaun sasán merkadória, ne’ebé iha Janeiru rekolla $23.292,57, Fevereiru 21.537.19, Marsu $ 17.888,01, Abríl $23.411,82 no Maiu $23.552.69.

“Alfándega kontribui taxa menus, tanba iha debate proposta Lei Orsamentu Retifikativu 2023 aprova hodi hatún taxa importasaun husi 5% ba 2,5%, husi lei vijente Orsamentu Jerál Estadu 2023”, dirijente ne’e dehan.

Iha alterasaun lei númeru 15/2022, 21 Dezembru OJE  2023, iha artigu 3, impostu taxa kontribuisaun iha númeru 5 durante 2023, taxa impostu seletivu konsumu aplikavel ne’ebé rovoga pontu a husi lei vijente, nune’e mós revoga númeru 6 husi artigu referidu.

Nuno Nogueira relembra mós katak, iha 2023, Alfándega Mota-Masin rekolla ona reseita entre Janeiru no Dezembru hamutuk $431.842,5 no iha 2022 arrekada $375.291,81.

Iha 2024 ne’e, Alfándega Mota-Masin simu ona orientasaun husi komisáriu atu kontribui reseita hamutuk millaun ida.

Tuir dadus nasionál, iha tinan kotuk, Autoridade Aduaneira kontribui reseita $103.298.640,22. Reseita sira ne’e mai husi taxa importasaun $33.594.458,10, taxa seletivu konsumu $46.168.534,14, taxa sobre venda $22.903.107,21, penalidade $302.439,37, restante maka taxa importasaun, esportasaun no taxa aduaneira sira seluk.

Notísia relevante: Alfándega Mota-Masin arrekada reseita $431.842

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!