Konstrusaun Sentru Saúde Internamentu Uatulari iha progresu
VIKEKE, 28 Setembru 2026 (TATOLI)–Tékniku Empreza Lekduadyti Unipessoal, Lda, Ambrozu Moniz de Carbalho, informa konstrusaun Sentru Saúde Internamentu iha Suku Uaitame, Postu Administrativu Uatulari, Munisípiu Vikeke, daudaun ne’e iha progresu servisu.
“Kona-ba progresu konstrusaun uma Sentru Saúde Internamentu Postu Uatulari, progresu atuál atinje pursentu 7.5. Iha obra ida-ne’e ami sei konstrui uma lima kompostu husi edifísiu ida, uma internamentu, izolamentu, mortuáriu, koziña no armazein,” Ambrozu Moniz ba TATOLI iha Postu Uatulari, Segunda ne’e.
Notísia relevante : https://tatoli.tl/2026/08/24/obra-sentru-saude-internamentu-uatulari-hahu-faze-konstrusaun/
Nia relata medida ba uma ba internamentu ne’e kompostu husi edifísiu ida medida 13×5, uma internamentu medida 29×28, izolamentu medida 7×8, mortuáriu 13×8, koziña no armazein medida 9×6.
“Progresu servisu ne’ebé agora daudaun ami atinje iha terrenu tuir item servisu sira mak hanesan cutting rai hotu ona, uma edifísiu mak daudaun ne’e hahú konstrui fondasi, uma tolu mak monta ona staka no uma armazein inklui koziña mak seidauk tau estaka. Nune’e, ami agora kontinua esforsu para aselera servisu tanba agora tempu bailoron, ne’ebé tenke esforsu halo moru protesaun sira,” nia esplika.
Kolokasaun traballadór, nia dehan, konstrui edifísiu koloka ema na’in ualu (8), uma internamentu badaen na’in-sanulu (10) no arnazein koloka badaen na’in-neen (6).
Kona-ba dezafiu, Ambrozu subliña, dezafiu ne’ebé empreza enfrenta mak materiál hanesan rai-henek no fatuk tanba iha kontratu laran rai-henek husi Bikaren, Postu Vikeke Vila no fatuk tenke tula iha área Ailembata, Suku Babulu, Postu Uatulari, ne’ebé distánsia dook.
“Dezafiu seluk mak simente ne’ebé agora daudaun folin kada saka sa’e ba $6. Ida-ne’e fó mós impaktu ba ami, maibé agora daudaukln ne’e ami sei iha estoke simente tonelada lima (5),” nia hato’o.
Projetu konstrusaun foun Sentru Internamentu Uatulari ne’e maihusi Orsamentu Jerál Estadu (OJE) ne’ebé aloka ba Autoridade Munisípiu Vikeke ba tinan 2026, ho montante $432.279,11, nú kontratu 2643/AMV/VII/2026, responsabiliza husi Wmpreza Lekduadyti Unip, Lda, durasaun servisu fulan (6).
Entretantu, konstrusaun fasilidade Sentru Internamentu Uatulari foun ne’e sei benefísia populasaun postu rua hanesan Postu Uatulari kompostu suku ualu (8) ho totál populasaun hamutuk 76.972 no Postu Uatukarbau kompostu husi suku neen (6) ho totál populasaun 7.212-resin.
Jornalista: Vitorino Lopes da Costa
Editór: Xisto Freitas da Piedade
