PCIC no SNIE detein suspeitu estrajeiru na’in-rua ba kazu droga
DILI, 28 Setembru 2026 (TATOLI)–Portavós Polísia Sientifika Investigasaun Kriminál (PCIC, sigla portugés), Mário Tavares, informa, iha Domingu (27/09) madrugada oras la apuradu, ekipa konjunta kompostu husi PCIC no Servisu Nasionál Intelijénsia Estrátejiku (SNIE) detein sidadaun xineza na’in-rua ho inisiál JL no QJ tanba suspeitu ba kazu droga.
Ekipa detein sidadaun estranjeiru na’in-rua iha sira-nia rezidénsia Manleuna no Bebonuk.
“Husi detensaun referidu, iha arguidu sira-nia pose iha substánsia balun ne’ebé sira prejume katak subtánsia ilísitu hanesan drogra, entaun ita halo detensaun,” Mário Tavares hato’o iha nia knaar fatin, edifísiu PCIC, Kolmera, Segunda ne’e.
Nia dehan, hafoin ekipa asegura tiha suspeitu sira, lori kedan bá edifísiu iha Kolmera hodi halo prosesu teste rápidu ba produtu sira ne’ebé ekipa halo apreensaun iha suspeitu sira-nia rezidénsia.
“Husi rezultadu teste rápidu, konfirmadu katak iha faze daudaun produtu sira ne’e pozitivu ho afetamina ho metafetamina, no ekipa mós halo kooperasaun ho saúde Óspitál Nasionál Guido Valaderes halo mós teste urina ba supeitu ida ho inisiál JL, nia hetan rezultadu pozitivu iha MDMac Afitamina no Metafitamina,” nia akresenta.
Notísia relevante : Arguidu estranjeiru na’in-rua envolve kazu droga kumpre Prizaun Preventiva
PCIC mós halo apreensaun ba suspeitu sira-nia sasán hanesan osan ho montante US$14.800, Rp 2.000.000 inklui telemóvel lima, nune’e sei sujeita ba ezaminasaun tuir mai.
“Daudaun suspeitu sira hela iha kostódiu Polísia ho prosesu 72 oras ba iha primeira interrogatóriu iha Tribunál,” nia katak.
Portavós relata, iha loron 12 Setembru 2026, PCIC hamutuk ho SNIE asegura no detein suspeitu ida sidadaun Indonezia ida ho inisiál W iha área Dili laran ne’ebé mak lori mós produtu droga.
“Dala ida tan SNIE serbisu hamutuk PCIC hodi halo detensaun no dala-ida tan prosesu ramata ona, nia (arguidu W) iha ona prizaun preventiva no ba kazu ida-ne’e, PCIC komesa ona simu prosesu refere husi Ministériu Públiku hodi kontinua halo investigasaun,” nia katak.
Sidadaun estranjeiru na’in-rua ne’ebé hetan detensaun ne’e maioria mai ho vistu turista.
Maski nune’e, Portavós seidauk bele konklui katak sidadaun ne’ebé maka ekipa detein iha relasaun ho suspeitu ida kaer dahuluk ne’e tanba buat hotu sei iha investigasaun, nune’e hafoin faze ne’e mak bele hatene posibilidade iha korelasaun.
“Karik suspeitu ne’e halo komunikasaun sira ho suspeitu ida antes ne’e, entaun iha ezaminasaun ba sira-nia telemóvel mak ita foin hatene, iha koneksaun ida-ne’e ou seidauk iha koneksaun,” nia argumenta.
PCIC daudaun sei lori suspeitu na’in-rua ne’e ba Tribunál ho objetu apreendidu sira ne’ebé momentu ekipa sira foti iha suspeitu na’in-rua nia rezidénsia no lori ba Tribunál atu halo validasaun.
“Ita seidauk ko’alia kona-ba ezaminasaun ba telemóvel ne’e hafoin Primeira Interrogatóriu, bainhira Ministériu Públiku autoriza ona mak ita foin halo ezame telemóvel. Ita labele hakat liu kompeténsia ne’ebé maka rezerva ba iha autoridade judisiál sira, liuliu kompeténsia juíz no Ministériu Públiku nian,” nia subliña.
Jornalista : Natalino Costa
Editór : Evaristo Soares Martins
