Portavós PCIC : “seidauk iha dadus sufisiente Timor-Leste hanesan país komersializasaun droga”
DILI, 28 Setembru 2026 (TATOLI)–Portavós Polísia Sientífika Investigasaun Kriminál (PCIC, sigla portugés) Mario Taváres, konsidera Timor-Leste seidauk sai fatin alvu ba krime transasaun tráfiku droga.
“Seidauk iha dadus sufisiente atu dehan Timor-Leste ba país ne’ebé perigu ba komersializasaun droga,” Mário Tavares hateten ba Jornalista sira iha nia knaar fatin, Kolmera Segunda ne’e.
Nia dehan, tenke iha dadus konkreta bainhira justifika katak Timor-Leste hanesan fatin ba transasaun droga.
“Ita labele haree sai husi realidade katak kuantu mais país ida komesa dezenvolve sasán ilísitu sira ne’e mós bele komesa sirkula iha ita-nian rai,” nia akresenta.
Notísia relevante : PCIC no SNIE detein suspeitu estrajeiru na’in-rua ba kazu droga
Portavós hateten, sidadaun estranjeiru ne’ebé mak hetan detensaun hafoin aprofunda investigasaun mak bele haree produtu sira ne’e fa’an ka halo transasaun.
“Kazu ne’ebé akontese rua iha 2026 labele dehan Timor-Leste bele ona sai hanesan padraun atu órgaun Polísia kriminál no sosiedade sivil toma atensaun katak bele komesa iha transasaun droga iha Timor-Leste. Dadus konkretu iha ida ka rua ita seidauk bele konklui ita sai hanesan país komersializasaun droga,” nia katak.
Portavós dehan tan, iha nasaun avansadu balun, iha kondisaun ne’ebé ema lori droga mós bele ultrapasa iha Servisu Alfándega no Migrasaun.
“Ita la hatene ne’e hanesan dezafiu ida ba ita hotu no ha’u hanoin mezmu ita ho ita-nia ekipamentu muitu sufistifikadu, maibé buat ne’e bele pasa nafatin tanba sira servisu organizadu iha rede no depois ha’u fiar katak Alfándega, sira iha fronteira sira Servisu Migrasaun durante ne’e serbisu ne’ebé mak kapas no furak. Durante ne’e ita tenta mellór posível hodi impede sasán sira ne’e,” nia katak.
Jornalista : Natalino Costa
Editora : Julia Chatarina
