Projetu adisionál kilomentu haat iha Oésilo, Waskita hahú asfáltika ba Noél-Ekat

OEKUSI, 28 setembru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, akompaña husi Diresaun Rejionál Obra Públika, segunda ohin, halo lansamentu nahe asfáltika ba projetu estrada adisionál kilomentu haat, ne’ebé ezekuta husi kompaña PT.Waskita Karya hahú husi Oésilo sentru liga ba mota Noél-Ekat.

Hafoin halo lansamentu, Prezidente Autoridade ne’e, hato’o agradese ba kompañia konstrutora PT.Waskita Karya ho servisu obra públika,  tanba ba oin fasilita ona movimentu populasaun husi Pássabe Oésilo bele asesu ho di’ak bainhira viajén ba Oekusi vila.

“Ohin ita akompaña nahe safáltu ba trosu ida adisionál ba kontratu, entre Waskita ho Governu hahú kedas iha Autoridade anteriór sira, hanoin katak iha posibilidade atu halo servisu adisionál, tanba antes ne’e projetu konsidera estrada nasionál husi Tono lig aba fornteira napan, maibé hafoin deskusaun aumenta adisionál husi Oésilo sentru mai to’o mota Noél-Ekat,” nia hateten iha Oésilo, ohin.

Notísia relevante:Waskita sei ezekuta projetu adisionál kilometru haat iha Oesilo inklui ponte Noél-Ekat

Autoridade ne’e, apela ba komunidade sira atu kontribui, bainhira kompañia sei kontinua nahe asfáltu presiza kumpre, atu hado’ok animál sira labele estraga inklui utilizadór transporte sira, tanba estrada sei fui hela alkatroada, presiza tempu, bainhira autorizadu ona kompañia maka foin bele asesu.

“Sei hakarak ita nia estrada di’ak, entaun ita tenki respeita malu, tanba dalan sira-ne’e halo bai ta atu asesu ho di’ak, sei kompañia ohin fui, aban asesu ona ho transporte, entaun sei hetan estragu, tanba ita espera, ita hotu kumpre, bele to’o semana ida ou semana rua mak foin bele asesu, tanba presiza estrada ne’e maran,” nia apela.

 Notísia relevante:MOP preokupa projetu estrada Tono-Oésilo tanba konsidera mosu dezekílibru

Diretór servisu Rejionál Obra Públika Oekusi, Remigío Nuno Sila, informa, katak, antes ne’e Autoridade RAEOA ho Ajénsia Dezenvolvimentu Nasionál, Institutu Públiku (ADN,I.P) hamutuk ho empreza PT.Waskita Karya iha konkordánsia legál atu aumenta projetu adiosionál kilometru haat ba projetu estrada hosi Tono ba Oésilo.

Desizaun koletiva ne’e tanba bazeia ba valór kontratu ba projetu estrada hosi Tono ba Oésilo bo’ot liu, empreza Waskita Karya ezekuta projetu referida ho distansia kilometru 17, hahú husi Tono suku Cunha sub-rejiaun Pante Makasar to’o fronteira Oésilo suku Bobometo sub-rejiaun Oésilo kompara ho nia verba millaun $33-resin.

Tanba ne’e, iha mandantu Prezidente Autoridade Sesante, Rogério Tiago Lobato, rekomenda presiza halo revizaun ba Bill of Quantity (BoQ) hodi aumenta projetu adisionál kilometru haat, hahú hosi Oésilo to’o mota Noél-Ekat inklui kontrusaun ponte iha mota Noél-Ekat.

Notísia relevante:Rogério Lobato preokupa projetu estrada Tono ba Oésilo gasta millaun 33-resin

Rekorde fali katak, kompañia Internasionál PT. Waskita Karya, ezekuta projetu estrada nasionál ne’e hahú husi eis merkadu Tono, suku Cunha, sub-rejiaun Pante Makasar to’o fronteira Napan, suku Bobometo, sub-rejiaun Oésilo ho distánsia kilómetru 17, ezekuta ho valór kontratu millaun $33,915,000.00, orsamentu ne’e Autoridade RAEOA prevee hosi Orsamentu Jerál Estadu (OJE) 2023 nian, ho durasaun servisu durante tinan rua

Jornalista: Abílio Elo Nini

Editór: Rafael Ximenes de A. Belo