Delegasaun NUS hato’o misaun negósiu ba Xefe Estadu
DILI, 29 Setembru 2026 (TATOLI)—Líder Delegasaun Seguransa Universidade Nasionál Singapura (NUS), Soh Yi Da, hanutuk ho nia ekipa, Tersa ne’e, hala’o enkontru ho Prezidente Repúblika, José Ramos-Horta, iha Palásiu Prezidensiál.
“Ami mai husi Sosiedade Universidade Nasionál Singapura nian. Ida-ne’e mak ami-nia misaun negósiu ba Timor-Leste, no ne’e hanesan enkontru ida-ne’ebé produtivu tebes ho Prezidente,” Soh Yi Da hateten ba Jornalista sira hafoin enkontru.
Parte rua troka hanoin kona-ba Timor-Leste nia knaar importante iha jeopolítika rejionál no globál, no iha biban hanesan Prezidente Horta fahe nia esperiénsia moris no enkorajamentu ba konstrusaun nasaun.
“Ami-nia misaun negósiu mai Timor-Leste hahú ona horisehik. Ami sei hela iha Timor durante loron-haat nia laran. Ami hasoru malu ho ministériu oioin no ofisiál Governu nian, inklui Kámara Komérsiu,” nia hato’o.
Notísia relevante : INTERPOL fó formasaun ba Autoridade Seguransa no Defeza
Objetivu prinsipál husi vizita ne’e la’ós relasiona ho krime internasionál no seguransa fronteira, maibé atu komprende oportunidade ekonómika no oportunidade negósiu iha Timor-Leste.
“Ami iha ne’e atu komprende oportunidade ekonómika no oportunidade negósiu, oinsá ami bele kontribui hodi apoia Timor-Leste no atu haburas kolaborasaun bilaterál Singapura ho Timor-Leste ne’ebé boot liu,” nia tenik.
Prezidente Ramos-Horta fahe mensajen kona-ba lideransa, liuliu importánsia atu iha forsa intelektuál ne’ebé forte no vizaun atu lori Timor-Leste ba oin.
Jornalista : Hortêncio Sanchez
Editora : Julia Chatarina
