Embaixadór Britániku destaka importánsia relasaun bilaterál ho Timor-Leste
DILI, 29 Setembru 2026 (TATOLI)–Embaixadór Britániku naun rezidente ba Timor-Leste, Dominic Jermy, haksolok bele filafali mai Timor-Leste no diskute ho Prezidente Repúblika, José Ramos-Horta kona-ba importánsia relasaun bilaterál entre nasaun rua.
“Ida-ne’e hanesan ksolok ida atu filafali mai Timor-Leste, nasaun ida-ne’ebé ha’u mai uluk, iha tempu uluk, durante períodu imediatamente hafoin Konsulta Populár iha tinan 1999,” Embaxadór ne’e hateten ba Jornalista sira hafoin ramata enkontru ho Xefe Estadu iha Palásiu Prezidensiál, Bairru Pité, Tersa ne’e.
Notísia relevante : Embaixadór Britániku no PM Xanana diskute hametin kooperasaun bilaterál
Diplomata ne’e dehan, enkontru ne’e ko’alia kona-ba oinsá nasaun rua bele serbisu hamutuk ba povu timoroan no britániku sira.
“Agora ha’u diskute hela ho Prezidente kona-ba importánsia husi ita-nia relasaun bilaterál, oinsá ita serbisu hamutuk ba timoroan sira no ba ema britániku sira, oinsá iha Reinu Unidu valoriza timoroan 30.000-resin ne’ebé hela iha Reinu Unidu no kontribui ba ita-nia sosiedade, no oinsá ita hamutuk serbisu iha Nasoins Unidas atu harii mundu ida-ne’ebé seguru liu,” nia katak
Aleinde ne’e, Embaixadór Dominic Jermy mós informa katak iha tempu badak sei hasoru malu ho Primeiru-Ministru no sei vizita projetu balun iha Vikeke no fatin seluk ne’ebé Governu Reinu Unidu apoia ona atu harii reziliénsia tasi-ibun no apoia dezenvolvimentu iha Timor-Leste.
Jornalista : Hortêncio Sanchez
Editora : Julia Chatarina
