Embaixadór Britániku no PM Xanana diskute hametin kooperasaun bilaterál
DÍLI, 28 Setembru 2026 (TATOLI) — Embaixadór Reinu Unidu ba Timor-Leste, Dominic Jermey, hala’o enkontru ho Primeiru-Ministru Kay Rala Xanana Gusmão hodi diskute esforsu hamutuk ba hametin no dezenvolve relasaun no kooperasaun bilaterál entre nasaun rua.
Enkontru ne’e hala’o iha Palásiu Governu, Díli, Segunda ne’e (28/9), no sai oportunidade ba parte rua atu reafirma amizade no revee prioridade sira iha kooperasaun bilateral.
“Enkontru ne’e reafirma kooperasaun bilaterál entre Timor-Leste ho Reinu Unidu,” Embaixadór Dominic Jermey hateten ba jornalista sira hafoin enkontru ho Xefe Governu.
Nia hateten katak sira mós ko’alia kona-ba benefísiu remesa husi traballadór timoroan sira iha Reinu Unidu, ne’ebé kontribui ba família no dezenvolvimentu ekonómiku iha Timor-Leste.
Além ne’e, sira diskute mós kona-ba importánsia programa bolsa-estudu Chevening ba sidadaun timoroan sira atu kontinua estudu iha Reinu Unidu.
“Ami mós ko’alia kona-ba importánsia bolsa-estudu ba timoroan sira ne’ebé husi Timor-Leste ba Reinu Unidu liuhusi Programa Bolsa Chevening. Hafoin remata sira-nia estudu, sira fila mai Timor-Leste no kontribui ba nasaun ida-ne’e,” nia hateten.
Embaixadór ne’e mós hateten katak enkontru ne’e sai oportunidade atu revee kooperasaun entre Timor-Leste no Reinu Unidu nu’udar parseiru diálogu ASEAN.
Reinu Unidu selebra tinan lima nu’udar parseiru diálogu ASEAN iha tinan 2026, enkuantu Timor-Leste sai ona membru ASEAN besik tinan ida.
“Enkontru ne’e sai oportunidade di’ak ida ba Primeiru-Ministru no ha’u atu revee hamutuk ita-nia amizade no define objetivu sira kona-ba oinsá ami hakarak dezenvolve no hametin liután amizade ne’e iha futuru,” Embaixadór Dominic Jermey dehan.
Nia mós hateten katak relasaun entre Timor-Leste no Reinu Unidu kontinua dezenvolve, maski komunidade internasionál enfrenta dezafiu oioin.
“Ida-ne’e mak tempu ida ne’ebé dezafiante iha nivel internasionál, no ha’u kontente tebes tanba relasaun entre Timor-Leste no Reinu Unidu kontinua sai metin liután,” nia hatutan.
Nia konklui katak nasaun rua presiza haree ba futuru no haree buat sira ne’ebé parte rua sei atinji hamutuk, maski iha dezáfiu sira iha nivel global.
Jornalista: Alexandra da Costa
Editór: Filomeno Martins
