Juíza Ana Paula deklara iha sala julgamentu lamenta ho desizaun KSMJ
DILI, 29 Setembru 2026 (TATOLI)–Juíza Ana Paula Fonseca deklara lamenta ho Konsellu Superiór Majistratura Judisiál (KSMJ) nia desizaun foin daudaun liuhusi reuniaun hodi muda juíz na’in-haat bá Tribunál Judisiál Primeira Instánsia seluk sein justifikasaun ne’ebé klaru.
Kestaun ne’e Juíza hato’o bainhira prezide julgamentu ba kazu NUK 0050/22 ALSIC no 0016/22. ALSIC Tribunál Judisiál Primeira Instánsia Dili.
Juíz na’in-haat husi Tribunál Primeira Instánsia Dili ne’ebé hetan transferénsia ba fatin seluk mak hanesan Juíza Ana Paula Fonseca, Juíza Francisca Cabral, Juíz José Gonçalves no António Fonseca. Juíza Ana Paula Fonseca hetan transferénsia bá Tribunál Judisiál Primeira Instánsia Oekusi.
Reklamante sira kontesta KSMJ nia desizaun no konsidera laiha transparánsia tanba molok atu muda juíz ida tenke hetan aseitasaun husi juíz sira ne’ebé atu hetan transferénsia.
Notísia relevante : Jurista Pedro Camões konsidera desizaun KSMJ tenta imposibilita Juíz iha TR
Molok Juíza Ana Paula Fonseca atu pronúnsia nia lamentasaun, nia husu autorizasaun ba Prokuradór Nelson Magno no Defensór Públiku Genini Daos hodi autoriza jornalista sira halo gravasaun no foti vídeo iha sala julgamentu. Nune’e, sira laiha objesaun no autoriza juíza hato’o nia lamentasaun.
“Até prezente data, ami seidauk hetan notifikasaun ruma ba akta deliberasaun Konsellu Superiór Majistratura Judisiál kona-ba ami-nia transferénsia,” Juíza Ana Paula deklara.
Nia dehan, atu muda juíz ida la’ós deside muda de’it hanesan buat baibain, maibé tenke liuhusi prosesu ida.
“Ha’u-nia transferénsia tanba saida? Tanba la’ós movimentasaun hanesan baibain,” nia akresenta.
Ana Paula lamenta tanba prosesu sei iha reklamasaun, maibé Juíz Administradór Tribunál Judisiál Primeira Instánsia Dili, Yudi Pamunkas liuhusi nia Sekretária Jusisiál la atribui ona prosesu sira ba juíz na’in-haat ne’ebé mak Konsellu deside atu halo ona transferénsia.
“Ida-ne’e tuir intendementu ha’u-nia ka tuir pontu devista ha’u-nia katak, ha’u sei iha kompeténsia iha Tribunál Dili atubele interven iha prosesu sira ne’ebé destribui mai ha’u até momentu,” nia hato’o.
Juíza ne’e dehan, hanesan ema membru Rezisténsia Nasionál Estudante Timor-Leste (RENETIL), nia prontu asegura nafatin servisu Tribunál nian.
“Ha’u prontu nafatin até agora atu asegura katak apezarde ema barak durante ne’e ko’alia katak iha Tribunál, juíz sira-nia independénsia laiha ona, sistema judisiáriu promovidu ba buat ne’ebé mak ladi’ak, mas ha’u garante ami sei iha ema ida rua, sei fó liafuan ne’ebé garantia katak iha Tribunál, juíz sira iha ne’ebá sei imparsiál, sei garante justisa ba povu hotu-hotu hanesan no ami sei deziste nafatin. Nu’udar ema timoroan ami sei iha independénsia totál ba povu ida-ne’e liuhusi ami-nia ezersísiu ba funsaun,” nia afirma.
Jornalista : Natalino Costa
Editora : Julia Chatarina
