Juíza Ana Paula rekoñse iha intervensaun liga ho kazu droga suspeitadu husi arguidu estranjeiru
DILI, 29 Setembru 2026 (TATOLI)–Juíza Ana Paula Fonseca rekoñese katak bainhira nia prezide kazu droga ne’ebé suspeitadu husi arguidu estrajeiru ho inisiál AM iha Sábadu (19/09) ne’e iha interferénsia balun.
Nia haktuir, juíz balun iha Tribunál tenta hasai prosesu ida-ne’e husi nia parte tanba konsidera nia la’ós ona juíz iha Tribunál Dili, nune’e laiha ona direitu ba atribuisaun prosesu ne’e hodi lidera Primeira Interrogatóriu.
“Ha’u ko’alia hanesan ne’e tanba iha intervesaun administrativa ne’ebé la devia halo mai iha juíz sira, para mais ne’e la’ós primeira vez, antes ne’e halo ona no foin daudaun mós halo, obriga ha’u-nia ofisiál atu sai husi sala audénsia, maibé ida-ne’e la akontese tanba ha’u mantein firme nafatin to’o Primeiru Interrogatóriu ramata,” Juíza Ana Paula deklara iha sala julgamentu, Tersa ne’e.
Notísia relevante : Aplikante 33 ba vaga Juíz STJ submete ba teste eskrita
Ana Paula haktuir, Juíz Administradór Tribunál Dili husu nia atu hamamuk gabinete no entrega fatin ba juíz sira seluk.
Enkuantu iha parte seluk, dezisaun husi Konsellu Superiór Majistratura ne’ebé delibera no deside katak transfere juíz ba Tribunál seluk ne’e sei iha hela reklamasaun no seidauk iha desizaun finál.
“Obriga ami tenke sai husi ami-nia fatin, hamamuk ami-nia gabinete sira atu bele fó espasu ba juíz sira seluk ne’ebé mai husi Tribunál sira seluk, enkuantu dezisaun husi Konsellu Superiór Majistratura ne’e ami sei halo reklamasaun no seidauk iha desizaun finál,” nia katak.
Antes ne’e, Tribunál deside liberta sidadaun estranjeiru AM ba kazu droga tanba faktu sira la sufisiente.
Jornalista : Natalino Costa
Editora : Julia Chatarina
